ئیدارەی خۆسەر داوای چەک هەڵگرتن لە هاووڵاتیان دەکات

PUKMEDIA

ئیدارەی خۆسەر

ئیدارەی خۆسەر داوا لە هاووڵاتیانی مەدەنی دەکات چەک هەڵبگرن و پارێزگاری لە خۆیان بکەن، هاوکات حکومەتی سوریا بە پێشێلکردنی رێککەوتنەکان و هێرشی بەردەوام تۆمەتبار دەکات و رایدەگەیەنێت: دیمەشق سوورە لەسەر بەردەوامیدان بە شەڕ و بژارەی سەربازی، لەبەر ئەوە، ئیدارەی خۆسەر داوا لە گەلەکەمان دەکەین بنەمای بەرگریی رەوا بکەنە بنچینە و شانبەشانی هێزە سەربازییەکانیان بوەستنەوە.

ئیدارەی خۆسەر ئەمڕۆ یەکشەممە 18-1-2026 لە راگەیەندراوێکدا چەکهەڵگرتنی گشتی راگەیاند و حکومەتی دیمەشقی بە پێشێلکردنی رێککەوتنەکان تۆمەتبار کردو راشیگەیاند کە هێرش لە چەندین بەرەوە دەکرێتە سەر هاووڵاتیان، هاوکات داواشی لێکردن چەک هەڵبگرن و رووبەڕووی شەڕی مان و نەمان ببنەوە.

ئەوەش دەڵێت: گروپە چەکدارەکانی سەر بە حکومەتی کاتیی دیمەشق رێککەوتنیان پێشێل کردووە و لە بەیانیی دوێنێوە تاوەکو ئێستا لە چەندین بەرەوە هێرشیان کردووەتە سەر هێزەکانمان، سەرەڕای هەوڵەکانمان بۆ دۆزینەوەی رێگەچارەی ئاشتییانە و "نیشاندانی نیازپاکی" لەرێگەی کشانەوە لە هەندێک ناوچە، "بەڵام دیمەشق سوورە لەسەر بەردەوامیدان بە شەڕ و بژارەی سەربازی، لەبەر ئەوە، ئیدارەی خۆسەر داوا لە گەلەکەمان دەکەین بنەمای بەرگریی رەوا بکەنە بنچینە و شانبەشانی هێزە سەربازییەکانیان بوەستنەوە، شارەکانیان بپارێزن و بەشداری لە شەڕی پاراستنی شکۆمەندیدا بکەن.

ئەوەش دەڵێت: ئامانجی هێرشەکان لێدانە لەو برایەتییەی کە بە خوێنی کوڕان و کچانی ئێمە بونیاد نراوە و دروستکردنی ئاژاوە و تووندوتیژییە لەنێوان پێکهاتەکانی باکوور و رۆژهەڵاتی سووریا، بۆیە داواش لە هەموو چین و توێژەکانی گەلەکەمان، بەتایبەتی گەنجان دەکەین، چەک هەڵبگرن و ئامادەبن بۆ رووبەڕووبوونەوەی هەر هێرشێکی چاوەڕوانکراو لە ناوچەکانی جزیرە و کۆبانێ. پێویستە بزانین کە لەبەردەم شەڕی مان و نەمانداین و بۆ پاراستنی دەستکەوتەکانمان، تاکە بژاردە بەرگریی گەلە.

PUKMEDIA