هەسەدە سەرجەم دەروازەکانی لەگەڵ حکومەتی سوریا داخست

روانگەى سورى بۆ مافەکانى مرۆڤ

سوریا

ئەمڕۆ پێنجشەممە 15ى1ى2026 هەسەدە بڕیاری داخستنی سەرجەم دەروازەکانی لەگەڵ ناوچەکانی ژێر دەسەڵاتی حکومەتی سوریا لە تەبقە، رەققە و دێرەزوور راگەیاند.

بەڕێوەبەرایەتیی گشتیی ئاسایشی دەروازە و هاتووچۆکاران لە باکوور و رۆژهەڵاتی سوریا کە لە ژێر کۆنترۆڵی هێزەکانی سوریای دیموکرات "هەسەدە"دایە، ئەمڕۆ بڕیاری داخستنی سەرجەم دەروازەکانی لەگەڵ ناوچەکانی ژێر دەسەڵاتی حکومەتی سوریا لە تەبقە، رەققە و دێرەزوور راگەیاند.

لە راگەیەندراوەکەدا هاتووە: ئەم بڕیارە لەبەر رۆشنایی "پەرەسەندنە ئەمنییە مەترسیدارەکان" دراوە و داخستنی دەروازەکان لەلایەن دیمەشقەوە بووەتە هۆی "گرژیی ئەمنی و پەرەسەندنێکی مەترسیدار" و "کاریگەریی راستەوخۆ و مەترسیداری لەسەر سەلامەتیی هاووڵاتییان، کارمەندان و گەشتیاران" دروست کردووە.

سەبارەت بە ماوەى بڕیارى داخستنى دەروازەکان، روونکراوەتەوە: ئەم بڕیارە " هەتا ئاگادارییەکی دیکە" کاری پێدەکرێت، هاوکات چەند حاڵەتێکی مرۆیی ئەم بڕیارە نایانگرێتەوە، وەکو:

- حاڵەتە مرۆییە بەپەلەکان

-رێکخراوە مرۆییە باوەڕپێکراوەکان

ئەمە لە کاتێکدایە، لە چەند رۆژی رابردوودا، سوپای عەرەبیی سوریا هێرشی سەربازیی کردە سەر هەردوو گەڕەکە کوردنشینەکەی حەلەب "شێخ مەقسوود و ئەشرەفییە"، کە بەهۆیەوە دەیان هاووڵاتیی کورد شەهید، بریندار و ئاوارەبوون.

PUKMEDIA