یه‌كه‌م رۆژنامه‌ی دوای راپه‌ڕین یادی دامەزراندنى ده‌كاته‌وه‌

PUKMEDIA

رۆژنامەی کوردستانی نوێ

ئەمڕۆ 12ی1ی2026، كوردستانی نوێ مۆمی 34 هه‌مین ساڵه‌ی ته‌مه‌نی داده‌گیرسێنێت، كه‌ زیاتر له‌ سێ ده‌یه‌ی بێوچان له‌ كاری رۆژنامه‌وانی سه‌نگینی و هاوسه‌نگی و راستگۆی له‌ پێشینه‌ی كاره‌كانی بووه‌و یه‌كه‌م رۆژنامه‌ی رۆژانه‌ی دوای راپه‌ڕینه‌.

ئەمڕۆ كوردستانی نوێ له‌گه‌ڵ ده‌رچوونی ژماره‌ نۆ هه‌زار و 932 خۆیدا مۆمی 34 ساڵه‌ی داده‌گیرسێنێت و له‌ داگیرساندنی یه‌كه‌م مۆمی ته‌مه‌نیشیه‌وه‌ كه‌ ژماره‌ سفر بوو له‌ رۆژی 12ی1ی1992، هه‌میشه‌ ده‌ستپێكی رۆژنامه‌كه‌ وته‌یه‌كی گرنگی سه‌رۆك مام جه‌لال بووه‌.

كوردستانی نوێ له‌ساڵی 1992 دوای بروسكه‌یه‌كی هه‌ڤاڵ مام جه‌لال بڕیاری جێبه‌جێكردنی دراو رۆژی 12ی1ی1992 ژماره‌ سفری رۆژنامه‌ی كوردستانی نوێ‌ خرایه‌ ژێرچاپ و بڵاوكرایه‌وه‌ كه‌ لێی نووسرابوو (كوردستانی نوێ، یه‌كێتیی نیشتمانیی كوردستان ده‌ریده‌كات)، هەروەها یه‌كه‌م رۆژنامه‌ی كوردیشه‌ كه‌ داوای مۆڵه‌تی ره‌سمی له‌وه‌زاره‌تی رۆشنبیری حكومه‌تی هه‌رێمی كوردستان كـــرد، مۆڵه‌تی ژماره‌ یه‌كی پێدرا.

یه‌كه‌م سه‌رنووسه‌ری رۆژنامه‌كه‌ ئه‌رسه‌لان بایز بووه ‌و دوای ئه‌ویش لە ماوەی جیاجیادا هەریەک لە (فه‌ره‌یدون عه‌بدولقادر و فریاد ره‌واندزی و مه‌حمود مه‌لا عیزه‌ت و كاوه‌ محه‌مه‌د و ستران عه‌بدوڵڵا و محه‌مه‌د كه‌ریم و د.عەدالەت عەبدوڵڵا) سەرنووسەری رۆژنامەکە بوون ،ئێستاش د.کاروان عەلی سەرنووسەرە.

ژمارە سفری رۆژنامەی کوردستانی نوێ

  
كوردستانی نوێ ده‌رهاوێشته‌ی رێككه‌وتێكی سروشتی بێ هۆكار و بنه‌ما نه‌بوو، له‌ نامیلكه‌و گۆڤاره‌كانی شاخه‌وه‌ له‌ده‌م ئامێره‌ سه‌ره‌تاییه‌كانی چاپ و رۆنیۆوه‌، له‌ ستافه‌ رووناكبیره‌كانی راگه‌یاندنی (یه‌كێتیی نیشتمانیی كوردستان )ه‌وه‌ خه‌مڵی و  34 ساڵ له‌مه‌وبه‌ر یه‌كه‌م پیتی كوردی دوای راپەڕین له‌سه‌ر چه‌ند لاپه‌ڕه‌یه‌كی سپی بێگه‌رد، به‌رچاو روون، گه‌شبین چاپكرا.

وه‌ك یه‌كه‌م زه‌نگی ده‌نگی ئازادی رۆژنامه‌گه‌ری، سه‌وڵی قه‌ڵه‌م له‌ ده‌ریای ئازادیدا و له‌ ژێر ناوی ( كوردستانی نوێ ) دا وه‌ك رۆژنامه‌یه‌كی رۆژانه‌، بۆ یه‌كه‌مجار شه‌ره‌فی یه‌كه‌م رۆژنامه‌ی كوردی له‌ ئێخه‌ی خۆیدا.

PUKMEDIA