بانکی ناوەندنی عیراق راگەیەنراوێکی لەسەر ناجێگیری بەهای دینار بڵاوکردەوە

PUKMEDIA

دینار و دۆلاری ئەمریکی

بەڕێوەبەری راگەیاندنی بانکی ناوەندی عیراق رایدەگەیەنێت: هیچ گۆڕانکارییەک لە نرخی رەسمی دۆلاردا روینەداوە و وەک خۆی جێگیرە کە 1320 دینارە بۆ هەر دۆلارێک و ئەو نرخە بەرزەی ئێستا مامەڵەی پێوە دەکرێت، پەیوەندی بە خواستی بازاڕی ناڕەسمییەوە هەیە لە دەرەوەی سیستمی ئەو بانکە رێگەپێدراوانەی کاری حەواڵەی دەرەکی دەکەن.

دوای بەرزبوونەوەی نرخی دۆلار، حەیدەر غازی بەڕێوەبەری راگەیاندنی بانکی ناوەندی عیراق بە رۆژنامەی سەباح-ی راگەیاند: هیچ گۆڕانکارییەک لە نرخی رەسمی دۆلاردا روینەداوە و وەک خۆی جێگیرە کە 1320 دینارە بۆ هەر دۆلارێک و ئەو نرخە بەرزەی ئێستا مامەڵەی پێوە دەکرێت، پەیوەندی بە خواستی بازاڕی ناڕەسمییەوە هەیە لە دەرەوەی سیستمی ئەو بانکە رێگەپێدراوانەی کاری حەواڵەی دەرەکی دەکەن، هاوکات بانکی ناوەندی هۆکاری سەرەکی بەرزبوونەوەی دۆلار لە بازاڕی رەش (بازاڕی هاوتەریب) بۆ جێبەجێکردنی باجی گومرکی پێشوەختە دەگەڕێنێتەوە، کە وایکردووە خواست لەسەر دۆلار لە دەرەوەی سیستمی بانکی زیاد بکات.

راشیگەیاند: وەرگرتنی باجی گومرکی پێشوەختە بۆ مەبەستی حەواڵە، فشارێکی گەورەی لەسەر بازرگانان و داواکارانی دۆلاری نەقد دروستکردووە، ئەمەش هۆکاری سەرەکی بووە بۆ لاوازبوونی دینار لە بازاڕە ناوخۆییەکاندا و وەک خۆشمان بەردەوامین لە چاودێریکردنی بازاڕ و گرتنەبەری رێوشوێنی پێویست بۆ جێگیرکردنی نرخ و پاراستنی بەهای دراوی نیشتمانی.

PUKMEDIA