ساڵی رابردوو لەئیدارەی راپەرین چەندین پرۆژەی گرنگ ئەنجامدراون

کوردستانی نوێ

ئیدارەی راپەڕین

بەڕێوەبەری گشتی وەبەرهێنانی راپەڕین رایدەگەیەنێت: ساڵی رابردوو مۆڵەتی وەبەرهێنانمان داوە بە 9 پرۆژە و هەوڵەکانمان بەردەوامە بۆ ئەوەی پرۆژەی باشتر و چاکتر پێشکەشی ناوچەکە بکەین و مەبەستمانە گرنگی زیاتر بدەین بە پرۆژە پیشەسازی و گەشتیارییەکان.

شاهۆ نەجم بەڕێوەبەری گشتی وەبەرهێنانی راپەڕین بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لەماوەی ساڵی رابردوودا مۆڵەتی وەبەرهێنانمان داوە بە 9 پرۆژە کە سێکتەری جیاوازیان لەخۆگرتووە و تێچووەکانیان نزیکەی بە 40 ملیۆن دۆلار دەخەمڵێندرێن.

راشیگەیاند: لەماوەی دەستبەکاربوونمەوە مۆڵەتی وەبەرهێنانم داوە بە 30 پرۆژە و ئامانجمانە و پرۆژەی زیاتریش لە سنورەکەمان ئەنجامبدرێت، جگە لەوەی پێش دەستبەکاربوونیشم 54 پرۆژەی دیکە مۆڵەتی وەبەرهێنانیان پێدراوە، کە 12 پرۆژەیان تەواوبوون و 36 پرۆژەیان لەجێبەجێکردندان و 6 پرۆژەشیان مۆڵەتەکانیان هەڵوەشاوەتەوە.

بەڕێوەبەری گشتی وەبەرهێنانی راپەڕین ئاماژەی بەوەشکرد، هەوڵەکانمان بەردەوامە بۆ ئەوەی پرۆژەی باشتر و چاکتر پێشکەشی ناوچەکە بکەین و مەبەستمانە گرنگی زیاتریش بدەین بە پرۆژە پیشەسازی و گەشتیارییەکان.

PUKMEDIA