چالاکی بازرگانی لەدەروازە سنورییەکان و فڕۆکەخانەکانی هەرێم پەکی کەوت

ئاژانسەکان

دەروازەی سنوری

ئەندامێکی پەرلەمانی کوردستان رایگەیاندووە: فڕۆکەخانە و دەروازە سنورییەکانی هەرێم لەلایەن بانکی مەرکەزییەوە بە بلۆک کراو هەژمار دەکرێن و بەو هۆیەشەوە چالاکییە بازرگانییەکانی هەرێم پەکی دەکەوێت و ئەوەش کاریگەری لەدابەزینی نرخی دینار دەکات.

رەوەز ئەحمەد شا ئەندامی پەرلەمانی کوردستان لە فراکسیۆنی یەکێتیی نیشتمانیی کوردستان رایگەیاند: لەماوەی رابردوودا حکومەتی عیراق بڕیاری جێبەجێکردنی هەردوو (سیستمی ئەسیکۆدا و هاوتاکردنی باجی گومرگی) بۆ هەرێمی کوردستان دا و وادەکەشی تا ١/١/٢٠٢٦ درێژکردەوە، سەرباری ئەم هەڕەشە جدییە و جگە لەجێبەجێنەکردنی سیستمەکان، حکومەتی هەرێمی کوردستان هیچ ئامادەکاری و پلانێکی جێگرەوەی نەبوو بۆ زامنی بەردەوامی کار و جوڵەی بازرگانی.

وتیشی: بەپێی بڕیارەکە، چیتر فڕۆکەخانە و دەروازە سنورییەکانی هەرێمی کوردستان لەلایەن بانکی مەرکەزی و حکومەتی فیدراڵیەوە بە بلۆک کراو هەژمار دەکرێن و رێگە بەهیچ بازرگان و کۆمپانیایەک نادرێت بۆ هیچ جۆرە جوڵەیەکی بازرگانی (نێودەوڵەتی/بانکی) ئەم دەروازانەی هەرێم بەکار بێنێت.

 ئەوەشی راگەیاند: جێبەجێکردنی ئەم بڕیارەی حکومەتی عیراق بەدەر لەکاریگەری لەسەر بازرگانی و ئابووری هەرێمی کوردستان هۆکارێکی سەرەکیشە لە دابەزینی بەهای دینار و ناجێگیری بەهاکەی بەهۆی زیادکردنی ڕێژەی باج لەسەر بەشێکی زۆر لەکەلوپەلی هاوردە.

PUKMEDIA