سەرۆک کۆمار: پەرلەمان ئەرکى یاسادانان و چاودێریى کردنە

‎نوسینگەی راگەیاندنی سەرۆکایەتی کۆمار

د.لەتیف جەمال رەشید سەرۆک کۆمارى عیراق و هەیبەت حەلبوسى سەرۆکى ئەنجومەنى نوێنەرانى عیراق

سەرۆک کۆمار د.لەتیف جەمال رەشید، ئەمڕۆ دووشەممە 5ی کانونی دووەم 2026 لەبەغداد، چاویکەوت بەسەرۆکی ئەنجومەنی نوێنەران ، هەیبەت حەلبوسی، بەئامادەبوونی جێگری سەرۆکی پەرلەمان، فەرهاد ئەتروشی.

لەسەرەتای دیدارەکەدا سەرۆک کۆمار پیرۆزبایی لە هەیبەت حەلبوسی و جێگرانی کرد، بە بۆنەی بەدەستهێنانی متمانەی ئەندامانی ئەنجومەنی نوێنەران و هیوای سەرکەوتنی لە بەجێگەیاندنی ئەرکە دەستوورییەکان و بەهێزکردنی رۆڵی پەرلەمان لە پاڵپشتیکردنی پڕۆسەی دیموکراسی و چەسپاندنی کاری یاسادانان و چاودێریدا بۆ خواستن.

هەر لە دیدارەکەدا جەخت لە گرنگی بەردەوامی هەماهەنگی و هاوکاری نێوان سەرۆکایەتی کۆمار و پەرلەمان کرایەوە، بۆ مسۆگەرکردن و یەکخستنی رۆڵی نێوان دەسەڵاتە دەستوورییەکان کە دەبێتە پاڵپشتی سەقامگیری سیاسی و دەرکردنی یاساکانی کە خزمەت بە بەرژەوەندی گشتی و وەڵامدانەوەی خواستەکانی هاووڵاتییان لە بوارە جیاجیاکاندا.

لەلای خۆیەوە هەیبەت حەلبوسی، سوپاس و پێزانینی خۆی بۆ سەرۆک کۆمار و پابەندبوونی پەرلەمانی بۆ کاری هاوبەش لەگەڵ سەرۆکایەتی کۆمار و دەسەڵاتە دەستوورییەکان دەربڕی لەگەڵ بەردەوامبوون لە دەرکردنی یاسا و بەدواداچوونی پرسە لەپێشینەکان بۆ خزمەتی بەرژەوەندی گشتی دووپاتکردەوە

PUKMEDIA