پارێزگاری کەرکوک: بەڵێنەکانمان بۆ خەڵکی چەمچەماڵ جێبەجێدەکەین

راگەیاندنی پارێزگاری کەرکوک

د.رێبوار تەها پارێزگاری کەرکوک

بەبڕیاری پارێزگاری کەرکوک لەچەند رۆژی داهاتوودا نەوت بەسەر زیانلێکەوتووانی چەمچەماڵدا دابەشدەکرێت و رێبوار تەها-ش دەڵێت: ئەرکی ئیدارەی خۆجێی کەرکوکە لەهەموو بوارێکدا بتوانێت پشتیوانی خەڵکی چەمچەماڵ بێت.

د.رێبوار تەها پارێزگاری کەرکوک لەکۆنگرەیەکی رۆژنامەوانیدا رایگەیاند: ئیدارەی خۆجێی کەرکوک بە ئەرکی خۆی دەزانێت خزمەتی زیانلێکەوتووانی رووداوەکەی چەمچەماڵ بکات و قەرەبووی بەشێک لەو زیانانە بکاتەوە کە بەر هاووڵاتیان کەوتوون، لەوچوارچێوەیەشدا بڕیارمان داوە نەوتی سپی بەسەر زیانلێکەوتوواندا دابەشبکەین.

راشیگەیاند: بەپێی ئەو ئامارانەی بەدەستمانگەیشتوون هەزار و 460 ماڵ لەناو چەمچەماڵ و هەزار و 80 خێزانیش لەدەرەوەی چەمچەماڵ سوودمەند دەبن لە وەرگرتنی نەوتی سپی کە بڕەکەی 100 لیترە بۆ هەر خیزانێک و لەچەند رۆژی داهاتوودا نەوتیان بەسەردا دابەشدەکرێت.

د.رێبوار تەها ئەوەشی خستەڕوو، رەزامەنی وەزارەتی نەوتی عیراقمان وەرگرتووە بۆ پێدانی نەوتی سپی بەسەر ئەو خێزانانەداو ئیدارەی خۆجێی شارەکەش بە ئەرکی خۆی دەزانێت لەهەر بوارێکی دیکەدا بێت بەهانای خەڵکی ئازیز و خۆشەویستی چەمچەماڵەوە بچێت.

PUKMEDIA