هەیبەت حەلبوسی وەک سەرۆکی ئەنجومەنی نوێنەران هەڵبژێردرا

PUKMEDIA

هەیبەت حەلبوسی

پاش سوێندخواردنی یاسایی ئەندامانی ئەنجومەنی نوێنەرانی عیراق کە 309 کاندیدی دەرچوو بەشداربوون، لەیەکەم دانیشتنی خولی شەشەمی ئەنجومەنەکەدا هەیبەت حەلبوسی بەزۆرینەی رەها وەک سەرۆکی ئەنجومەنەکە هەڵبژێردرا.

هەڵبژاردنی هەیبەت حەلبوسی لە کاتێکدایە کە لە دانیشتنەکەی ئەمڕۆدا موسەنا سامەرائی رکابەری بۆ وەرگرتنی پۆستی سەرۆکی ئەنجومەنی نوێنەران کشانەوەی خۆی راگەیاند و بەمەش ماڵی سوننە زیاتر یەکخرا، بۆ وەرگرتنی ئەو پۆستە.

هەیبەت حەلبوسی بە 208 دەنگ پۆستی سەرۆکی ئەنجومەنەکەی وەرگرت و پێش رکابەرەکانی سالم عیساوی و عامر عەبدولجەبار کەوت، لەکاتێکدا دوو رکابەرەکەی ژمارەیەکی زۆر کەم دەنگیان هێناوە.

بەپێی ماددەی 55ی دەستوری هەمیشەیی عیراق پێویستە سەرۆکی پەرلەمان بەزۆرینەی رەهای ئەندامانی ئەنجومەنی نوێنەران، واتە نیوە + 1ی دەنگی ئەندامانی ئەنجومەنەکە، کە 165 دەنگ دەکات بەدەست بهێنێت، هەروەها بۆ هەڵبژاردنی جێگرانیش پێویستە بەهەمان میکانیزم هەڵبژێردرێن.

هەیبەت حەمەد عەباس حەلبوسی لە ساڵی 1980 لەدایکبووەو بڕوانامەی ماستەری لە زانستە سیاسییەکاندا هەیە و لە ئێستادا دیارترین سەرکردەی حزبی تەقەدوومە.

لەهەڵبژاردنی ئەنجومەنی نوێنەرانی عیراقدا لە پارێزگای ئەنبار زۆرترین دەنگی بەدەستهێناوەو یەکێکە لە کەسە نزیکەکانی محەمەد حەلبوسی.

لە خولی چوارەمی ئەنجومەنی نوێنەراندا سەرۆکی لیژنەی نەوت و وزە بووەو لە خولی پێنجەمیشدا سەرۆکی فراکسیۆنی تەقەدووم بووە.

هاوکات لە هەڵبژاردنی خولی شەشەمی ئەنجومەنەکەشدا زیاتر لە 51 هەزار دەنگی بەدەستهێناوەو ئەمڕۆش لەیەکەم دانیشتنی ئەنجومەنی نوێنەرانی عیراقدا بە 208 دەنگ بووە سەرۆکی خولی شەشەمی ئەنجومەنەکە.

PUKMEDIA