رێبوار تەها باشترین پارێزگاری باشووری كوردستانە

راگەیاندنی رێبوار تەها پارێزگاری كەركوك

رێبوار تەها پارێزگاری كەركوك

بەپێی راپرسییەك كە دەزگایەكی میدیایی لەهەرێمی كوردستان ئەنجامی داوە، رێبوار تەها كە پارێزگاری كەركوكە بەباشترین پارێزگاری باشووری كوردستان بۆ ساڵی 2025 هەڵبژێردراوە كە زیاتر لە90% ی دەنگەكانی راپرسییەكەی بەدەستهێناوەو هێشتا راپرسییەكەش بەردەوامیی هەیە.

لە راپرسییەكدا كە تۆڕ‌ی میدیایی رووداو لەفەیسبووك بەناونیشانی (كام پارێزگاری باشووری كوردستان لە 2025 باشترین بوو)، بڵاوكراوەتەوەو وێنەی هەریەك لە رێبوار تەها پارێزگاری كەركوك، د.هەڤاڵ ئەبوبەكر پارێزگاری سلێمانی، ئومێد خۆشناو پارێزگاری هەولێر، نوخشە ناسیح پارێزگاری هەڵەبجە و عەلی تەتەر پارێزگای دهۆك دانراوە، رێبوار تەها پارێزگاری كەركوك لەسەر پشكی یەكێتیی نیشتمانیی كوردستان، تەنها لەماوەی 4 سەعاتدا لەكۆی بەشداری نزیكەی 11 هەزار و 500 دەنگ، زیاتر لە 90% ی دەنگەكانی بەدەستهێناوەو هاووڵاتیان وەك باشترین پارێزگاری باشووری كوردستان دیارییان كردووە.

ئەمەش لەكاتێكدایە، رێبوار تەها پارێزگاری كەركوك، كە كاندید بوو بۆ هەڵبژاردنی خولی شەشەمی ئەنجومەنی نوینەرانی عیراق، 96 هەزار دەنگی بەدەستهێناو بووە خاوەنی زۆرترین دەنگ لەسەر ئاستی عیراق.

هاوكات مونا سامی پێشكەشكاری عیراقی، لەپەیامێكیدا لە ئێكس رایگەیاندبوو: ئەگەر رێز لە دەنگی دەنگدەر بگیرێت و بەپێی رێژەی زۆرترین دەنگ بێت، دەبێت رێبوار تەها پارێزگاری كەركوك، بكرێتە سەرۆك وەزیرانی عیراق.


هەروەها رۆژی 10ـی 8ـی 2024، رێبوار تەها، سەرۆكی هاوپەیمانی كەركوك هێز و ئیرادەمانە، لەپشكی كورد وەك پارێزگاری كەركوك هەڵبژێردرا.


رێبوار تەھا كێیە؟

رێبوار تەھا مستەفا ئەحمەد لە ساڵی 1981 لە گەڕ‌ەكی ئازادی لە شاری كەركوك لەدایك بووە و خوێندنی سەرەتایی و ناوەندی و ئامادەیی لە كەركوك تەواو كردووە.

خاوەنی بڕ‌وانامەی بەكالۆریۆسی پەروەردەی زمانی ئینگلیزی، بەكالۆریۆسی یاسا و بڕ‌وانامەی دیپلۆمی كارگێڕ‌ی و یاسایە لە پەیمانگای تەكنیكی كەركوك.

لەدوای پڕ‌ۆسەی ئازادكردنی عیراق، ھەتا ساڵی 2014 لەبواری ئەمنی و بەرەنگاربوونەوەی تیرۆر كاری كردووە، ساڵی 2014 بۆ جاری یەكەم بووە ئەندامی ئەنجومەنی نوێنەرانی عیراق و ئەندامی لیژنەی دەستپاكیی پەرلەمان.

لە ساڵی 2018 وەك سەرۆكی لیستی یەكێتیی نیشتمانیی كوردستان بۆ جاری دووەم بووەوە ئەندامی ئەنجومەنی نوێنەرانی عیراق و لەو خوولەدا جێگری سەرۆكی لیژنەی نەوت و وزە و ھەروەھا جێگری نووسینەوەی پەیڕ‌ەوەی ناوخۆی پەرلەمانی عیراق بووە.

لە خوولی سێیەم و چوارەمی پەرلەمانی عیراقدا، داكۆكیكاری پرس و مافەكانی خەڵكی كوردستان و كەركووك بووە.

لە كۆنگرەكانی چوارەم و پێنجەمی یەكێتیدا، وەك ئەندامی ئەنجومەنی سەركردایەتیی یەكێتیی نیشتمانیی كوردستان ھەڵبژێردرا.

لە ساڵی 2023 دا، وەك سەرۆكی ھاوپەیمانیی كەركووك ھێز و ئیرادەمانە، بەشداریی ھەڵبژاردنی ئەنجومەنی پارێزگاكانی كرد و بووە ئەندامی ئەنجومەنی پارێزگای كەركووك و دواتر بە پارێزگاری كەركوك هەڵبژێردرا.

رێبوار تەها، ماوەی كەمتر لەساڵێك و چوار مانگە پارێزگاری كەركوكە و لەو ماوەیەدا توانیویەتی بە بودجەیەكی كەمی پتڕۆدۆلار، چەندین پڕۆژەی ستراتیژی و خزمەتگوزاری گرنگ لە سنووری پارێزگای كەركوك ئەنجامبدات، جگە لە كۆنكرێتكردنی سەدان گەڕەك و كۆڵانی كەركوك و  رووناككردنەوەی شەقامەكانی شارەكە و چەندیدن خزمەتگوزاری دیكە.

PUKMEDIA