هێڵێكی ئاسمانیی نوێ گه‌شته‌كانی بۆ سلێمانی ده‌ستپێده‌كات

راگەیاندنى فڕۆکەخانەی نێودەوڵەتی سلێمانی

وێنەیەکى گەشتەکەى ئەمشەو

به‌ره‌به‌یانی ئه‌مڕ‌ۆ هێڵی ئاسمانی "پێگاسۆس" گه‌شته‌ ئاسمانییه‌كانی له‌ "فڕ‌ۆكه‌خانه‌ی نێوده‌وڵه‌تی سلێمانی" ده‌ستپێكرد و لێپرسراوی په‌یوه‌ندییه‌گشتییه‌كان و راگه‌یاندنی فڕ‌ۆكه‌خانه‌ی نێوده‌وڵه‌تی سلێمانیش ده‌ڵێت: "به‌پێی ئه‌و خشته‌یه‌ی راگه‌یاندراوه‌ هه‌فتانه‌ سێ گه‌شتی ئاسمانی له‌نێوان "ئه‌سته‌نبوڵ-سلێمانی-ئه‌سته‌نبوڵ" ئه‌نجامده‌ده‌ن.

دانا محه‌مه‌د سه‌عید لێپرسراوی په‌یوه‌ندییه‌گشتییه‌كان و راگه‌یاندنی فڕ‌ۆكه‌خانه‌ی نێوده‌وڵه‌تی سلێمانی‎، به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: به‌ره‌به‌یانی ئه‌مڕ‌ۆ 27ی12ی2025 پێشوازیمان له‌ هێڵێكی ئاسمانیی نوێ كرد، ئه‌ویش هێڵی ئاسمانی "پێگاسۆس"بوو، كه‌ ئه‌مه‌ش ده‌بێته‌ هۆی فراوانبوونی خشته‌ی گه‌شته‌كانی فڕ‌ۆكه‌خانه‌ی نێوده‌وڵه‌تی سلێمانی.

هاوكات له‌ راگه‌یه‌ندراوێكی فڕۆكه‌خانه‌كه‌دا هاتووه‌: له‌چوارچێوه‌ی فراوانكردنی گه‌شته‌ ئاسمانییه‌كان له‌ فڕ‌ۆكه‌خانه‌ی نێوده‌وڵه‌تی سلێمانی، هێڵی ئاسمانی "پێگاسۆس" گه‌شته‌ ئاسمانییه‌كانی بۆ فڕ‌ۆكه‌خانه‌ی نێوده‌وڵه‌تی سلێمانی ده‌ستپێكردوه‌.

ئه‌مه‌ له‌كاتێكدایه‌ له‌ 3ی نیسانی ساڵی 2023وه‌ توركیا قه‌ده‌غه‌ی گه‌شته‌كانی بۆ سلێمانی ده‌ستپێكردو رۆژی 15ی10ی 2025 "ده‌سه‌ڵاتی فڕ‌ۆكه‌وانی شارستانی توركیا" گه‌شته‌ ئاسمانییه‌كان و ئاسمانی وڵاته‌كه‌ی به‌ ڕ‌ووی گه‌شته‌كان بۆ فڕ‌ۆكه‌خانه‌ی نێوده‌وڵه‌تی سلێمانی ئاسایی كرده‌وه‌و رۆژی 2ی11ی2025 یه‌كه‌م گه‌شت ئه‌نجامدرایه‌وه‌.

PUKMEDIA