بارودۆخی حه‌له‌ب ئاسایی ده‌بێته‌وه‌

شرق الاوسط

سوریا

له‌سه‌ر راسپارده‌ی سه‌رۆكی ئه‌ركانی گشتیی سوپای سوریا، شه‌ڕ و پێكدادانه‌كانی حه‌له‌ب راگیرا و چه‌كدارانی حكومه‌تی كاتی سوریا و هێزه‌كانی هه‌سه‌ده‌ ئاماده‌ن كێشه‌كانیان به‌ لێكتێگه‌یشتن و گفتوگۆ چاره‌سه‌ر بكه‌ن، هاوكات به‌هۆی ئه‌و شه‌ڕو پێكدادانه‌وه‌ كه‌سێك كوژرا و نزیكه‌ی 10 كه‌سی دیكه‌ش برینداربوون، ئه‌مه‌ جگه‌ له‌وه‌ی له‌ هێزه‌ ئه‌منییه‌كانی هه‌ردوولاش بریندار هه‌یه‌.

سه‌رۆكی ئه‌ركانی گشتیی سوپای سوریا فه‌رمانێكی ده‌ركرد بۆ وه‌ستاندنی به‌ئامانجگرتنی پێگه‌كانی هێزه‌كانی سوریای دیموكرات (هه‌سه‌ده‌)، هاوكات هێزه‌كانی سوریای دیموكرات رایگه‌یاند، كه‌ وه‌ڵامدانه‌وه‌ی هێرشه‌كانیان بۆ هێرشه‌كانی ئه‌و لایه‌نانه‌ی كه‌ ناوی لێنابوو "فراكسیۆنه‌ حكومه‌تی دیمه‌شق" راده‌گرن، ئه‌مه‌ش به‌گوێره‌ی هه‌وڵه‌ به‌رده‌وامه‌كانی كه‌مكردنه‌وه‌ی توندوتیژی.

ئاژانسی هه‌واڵیی ره‌سمی سوریا "سانا" له‌ زاری وه‌زاره‌تی به‌رگرییه‌وه‌ بڵاویكرده‌وه‌، سه‌رۆكی ئه‌ركانی گشتیی سوپای سوریا، فه‌رمانی وه‌ستاندنی به‌ئامانجگرتنی پێگه‌كانی هێزه‌كانی سوریای دیموكراتی سوریای ده‌ركردووه‌.

به‌شی راگه‌یاندن و په‌یوه‌ندییه‌كانی وه‌زاره‌تی به‌رگری سوریاش رایگه‌یاند، سه‌رۆكی ئه‌ركانی گشتی سوپای سوریا فه‌رمانی راگرتنی به‌ئامانجگرتنی پێگه‌كانی "هێزه‌كانی سوریای دیموكراتی" ی له‌ حه‌له‌ب ده‌ركردووه‌.

فه‌رمانده‌یی گشتیی هێزه‌كانی ئاسایشی ناوخۆی سه‌ر به‌ هێزه‌كانی سوریای دیموكرات "هه‌سه‌ده‌" سه‌باره‌ت به‌ هێرشه‌كانی سه‌ر گه‌ڕ‌ه‌كی شێخ مه‌قسود و ئه‌شره‌فیه‌ به‌یاننامه‌یه‌كی بۆ رای گشتی بڵاوكرده‌وه‌ و رایگه‌یاند: هێزه‌كانمان راسپاردووه‌ كه‌ واز له‌ وه‌ڵامدانه‌وه‌ی هێرشه‌كانی چه‌كداره‌كانی سه‌ر به‌ حكومه‌تی دیمه‌شق بهێنن.

دوێنێ 22ی12ی2025 چه‌كداره‌كانی سه‌ر به‌حكومه‌تی كاتی سوریا هێرشیان كرده‌ سه‌ر گه‌ڕ‌ه‌كی شێخ مه‌قسود و ئه‌شره‌فیه‌ له ‌شاری حه‌له‌ب و له‌و هێرشانه‌دا كه‌سێك كوژراو 17 هاووڵاتی مه‌ده‌نیش برینداربوون.

بۆ پاراستنی خه‌ڵكی سڤیل و ئه‌و دوو گه‌ڕ‌ه‌كه‌، هێزه‌كانی ئاسایشی ناوخۆ له‌ حه‌له‌ب وه‌ڵامی هێرشه‌كانیان دایه‌وه‌ و توانیان زۆربه‌ی هێرشه‌كان پووچه‌ڵ بكه‌نه‌وه‌.

هاوكات ئیداره‌ی خۆسه‌ری باكورو رۆژهه‌ڵاتی سوریا به‌رپرسانی حكومه‌تی كاتی سوریای به‌ته‌واوی به‌رپرسیارێتی ئه‌و هێرشانه‌ زانی.

بۆ شه‌رمه‌زاركردنی هێرشه‌كانی سه‌ر گه‌ڕ‌ه‌كی شێخ مه‌قسوود و ئه‌شره‌فیه‌، هه‌زاران كه‌س له‌سه‌رانسه‌ری باكور و ڕ‌ۆژهه‌ڵاتی سوریا ڕ‌ژانه‌ سه‌ر شه‌قامه‌كان بۆ پشتیوانی ئه‌و دوو گه‌ڕ‌ه‌كه‌ و به‌رخۆدانیان.

له‌ راگه‌یه‌نراوه‌كه‌ی هه‌سه‌ده‌ دا هاتووه‌: "هێزه‌كانی ئاسایشی ناوخۆ له‌حه‌له‌ب، له‌ ڕ‌ێگه‌ی فه‌رمانده‌ی گشتی خۆیان، ئه‌خین نوجان، پشتڕ‌استی ده‌كه‌نه‌وه‌ كه‌ نزیكه‌ی چوار مانگه‌ گه‌ڕ‌ه‌كه‌كانی شێخ مه‌قسود و ئه‌شره‌فیه‌ له‌ژێر گه‌مارۆن، له‌لایه‌ن ئه‌و چه‌كدارانه‌ی سه‌ر به‌وه‌زاره‌تی به‌رگری حكومه‌تی كاتییه‌وه‌".

ئه‌و هێزانه‌ ڕ‌ایانگه‌یاند: "ئه‌م گه‌مارۆیه‌ هاوكات بوو له‌گه‌ڵ به‌رده‌وامی كرده‌وه‌ی ئیستفزازی له‌لایه‌ن ئه‌و چه‌كدرانه‌وه‌، به‌ ئامانجی ڕ‌اكێشانی ئێمه‌ بۆ ناو پێكدادانی سه‌ربازی، كه‌ مه‌ترسی ڕ‌استه‌وخۆ بۆ سه‌ر ئاسایش و سه‌قامگیری ناوچه‌كه‌ دروست ده‌كات، ئه‌م كارانه‌ هه‌وڵێكه‌ بۆ پێشێلكردنی ئه‌و ئاگربه‌سته‌ی كه‌ له‌نێوان هێزه‌كانی ئاسایشی ناوخۆ و حكومه‌تی كاتی سوریا ئیمزاكراوه‌، له‌كاتێكدا كه‌ هێزه‌كانمان پابه‌ندن به‌كاركردن بۆ به‌هێزكردنی سه‌قامگیری و ئاشتی".

هه‌روه‌ها هێزه‌كانی ئاسایشی ناوخۆی حه‌له‌ب رایگه‌یاندوه‌، به‌رده‌وامن له‌ كاركردن بۆ پاراستنی سه‌قامگیری و چاره‌سه‌ری ئاشتیانه‌ له‌ڕ‌ێگه‌ی گفتوگۆ و لێكتێگه‌یشتن له‌گه‌ڵ هه‌موو لایه‌نه‌ په‌یوه‌ندیداره‌كان".

ڕ‌ۆژی دووشه‌ممه‌ 22ی12ی2025 چه‌كداره‌كانی سه‌ر به‌حكومه‌تی كاتی هێرشیان كرده‌ سه‌ر گه‌ڕ‌ه‌كی شێخ مه‌قسوود و ئه‌شره‌فیه‌ له‌شاری حه‌له‌ب، له‌و هێرشانه‌دا كه‌سێك كوژرا و 17 هاووڵاتیی مه‌ده‌نیش له‌گه‌ڵ شه‌ش ئه‌ندامی هێزه‌كانی ئاسایشی ناوخۆ برینداربوون.

PUKMEDIA