ئەمریکا سزاکانی سەر سوریای لابرد

WHYY

کەمپى کۆنگرێسى ئەمریکا

کۆنگرێسی ئەمریکا پڕۆژەیاسای دەسەڵاتی بەرگریی نیشتمانی پەسەند کرد و یاسای قەیسەری هەڵوەشاندەوە، کە پێشتر بۆ سزادانی سوریا دەرکرابوو.

بە پاڵپشتیی هەردوو حزبی کۆماری و دیموکراتی ئەمریکا پڕۆژە یاسای دەسەڵاتی بەرگریی نیشتمانیی لە ئەنجومەنی پیران بە زۆرینەی 77 دەنگ بەرامبەر بە 20 دەنگ پەسەندکرا.

لەیاساکەدا سزاکانی "یاسای قەیسەر بۆ پاراستنی مەدەنییەکان لە سوریا" هەڵوەشێنرایەوە، کە لە ساڵی 2019 پەسەندکرابوو، ئەمیش  سیستەمێکبوو بۆ سزادانى فراوانی دەوڵەتی سوریا و هەر لایەنێک کە لە کەرتە گرنگەکانی وەک وزە، بیناسازی و فڕۆکەوانیدا مامەڵەی لەگەڵ دەکات.

هەر لە یاسا پەسەندکراوەکەدا، مووچە سەربازییەکان بە ڕێژەی %3.8  زیاددەکات و چاودێریی کۆنگرێس بەسەر وەزارەتی بەرگریدا بەهێزتر دەکات، هەروەها سنوور بۆ هەندێک لە بڕیارەکانی پێنتاگۆن سەبارەت بە جووڵەی هێزەکانی ئەمریکا لە دەرەوە دادەنێت بە تایبەتی لە ئەورووپا و کۆریای باشوور، لەگەڵ هێشتنەوەی ئاستی ئێستای هێزەکان لەوێ.

ئەمە لە کاتێکدایە هەفتەى رابردوو ئەنجومەنی نوێنەرانی ئەمریکا ئەو پڕۆژەیاسایەی کە لە سێ هەزار لاپەڕە پێکهاتووە پەسند کردبوو، ئێستا ئیمزای دۆناڵد ترەمپی ماوە و 14 رۆژ بۆ بڕیاری کۆتایی کاتى هەیە.

دواى هەڵوەشاندنەوەی یاسای قەیسەر، پڕۆژەیاساکە داوا لە سەرۆکی ئەمریکا دەکات، بۆ ماوەی چوار ساڵ، هەر شەش مانگ جارێک راپۆرتێک پێشکەش بە کۆنگرێس سەبارەت بە پێشکەوتنەکانی سوریا بکات، لە چەند پرسێکی سەرەکیدا.

 هاوکات ئەمڕۆ وەزارەتی دەرەوەی سوریا لە راگەیەندراوێکدا خۆشحاڵی خۆی بۆ هەڵگرتنی یەکجارەکی سزاکانی "یاسای قەیسەر" دەربڕی و حکومەتی سوریا جەختی کردەوە، ئەم بڕیارە دەبێتە هۆی سوککردنی ئەو بارگرانییە دارایی و مرۆییەی کە لە ساڵانی رابردوودا بەهۆی سزاکانەوە کەوتبووە سەر شانی هاووڵاتییانی وڵاتەکە و رێگە بۆ بووژانەوەی کەرتە جیاوازەکانی ژیان خۆش دەکات.

PUKMEDIA