پارێزگاری هەڵەبجە بەشداری لەلوتکەی شارە بەهێزەکانی جیهان دەکات

پەڕەی تایبەتی پارێزگار

پارێزگاری هەڵەبجە

پارێزگاری هەڵەبجە لەمیانەی بەشداریکردنی لە لوتکەی شارە بەهێزەکانی جیهان لە تۆرۆنتۆی وڵاتی کەنەدا رایگەیاند: بەشداریکردنمان لەم جۆرە بۆنە نێودەوڵەتییانە، هەنگاوێکی گرنگە بۆ ناساندنی زیاتری هەڵەبجە لەسەر ئاستی جیهان و کردنەوەی دەرگای نوێ بۆ کاری هاوبەش.

نوخشە ناسیح پارێزگاری هەڵەبجە لەپەڕەی تایبەتی خۆی لە تۆڕی کۆمەڵایەتی فەیسبووک لەبارەی بەشداریکردنی وەک پارێزگار و نوێنەری هەڵەبجە لوتکەی شارە بەهێزەکانی جیهان لە تۆرۆنتۆی وڵاتی کەنەدا رایگەیاند: ئەم لوتکەیە، کە ساڵانە ژمارەیەکی بەرچاو لە پارێزگار و سەرۆک شارەوانییەکانی جیهان کۆدەکاتەوە، سەکۆیەکی گرنگە بۆ ئاڵوگۆڕی ئەزموون و گفتوگۆکردن لەسەر باشترین ڕێگاکان بۆ بەڕێوەبردنی شارەکان.

وتیشی: لە میانی لوتکەکەدا، بەشداریمان لە چەندین کۆبوونەوە و پانێڵی جیاوازدا کرد، کە تێیدا باسی ئەزموونی تایبەتی پارێزگای هەڵەبجەمان کرد، وەک پارێزگایەک کە لەدوای کارەساتەوە هەستاوەتەوە و ئێستا لە چ قۆناغێکدایە و پێداویستییەکانی چین.

ئەوەش دەڵێت: هەروەها، لە پەراوێزی لوتکەکەدا، چەندین دیدار و کۆبوونەوەی گرنگمان ئەنجامدا و پەیوەندی و هەماهەنگی باشمان لەگەڵ نوێنەرانی چەندین شاری گەورەو بەهێزی جیهاندا دروست کرد، بە ئامانجی سوودوەرگرتن لە ئەزموونی سەرکەوتووی یەکتری.

ئەوەشی نوسیوە: بەشداریکردنمان لەم جۆرە بۆنە نێودەوڵەتییانە، هەنگاوێکی گرنگە بۆ ناساندنی زیاتری هەڵەبجە لەسەر ئاستی جیهان و کردنەوەی دەرگای نوێ بۆ کاری هاوبەش و پەرەپێدان.

PUKMEDIA