کێشەی بڕوانامە بێ مۆڵەتەکان لەنێوان ئەنجومەنی وەزیران و وەزارەتی داراییدا

راگەیاندنى حکومەتى هەرێم

لۆگۆى حکومەتى هەرێمى کوردستان

مافپەروەر کامۆ خدر لە پەیامێکیدا رایگەیاند: ئەنجومەنی وەزیران داوای روونکردەوە لە وەزارەتی دارایی و ئابوری دەکات سەبارەت بە هەژمارکردنی بروانامە بێ مۆڵەتەکان.

ئەوەشیخستەڕوو: ئەنجومەنی وەزیرانی هەرێمی کوردستان بە نوسراوی (15224) لە رێکەوتی 8ى12ى2025 داوا لە وەزارەتی دارایی و ئابوری دەکات  بۆچى تاکو ئێستا لیژنەی هەژمارکردنی بڕوانامە بێ مۆڵەتەکان راپۆرت و پێشنیارەکانی بۆ ئەنجومەنی وەزیران بەرزنەکردووەتەوە.

روونیشیکردەوە: ئەنجومەنی وەزیرانی هەرێمی کوردستان پێشتر بە نوسراوی 16920 لە رێکەوتى 24 ى 12ى 2023 نوسراوی ئاڕاستەی هەریەک لە وەزارەتەکانی (دارایی و ئابوری و پلاندانان و خوێندنی باڵا و توێژینەوەی زانستی کردبوو لیژنەیەک پێکبهێنریت بۆ هەڵسەنگاندن و دیاریکردنی حاڵەتەکانی بەدەستهاتوو لە ئەو بڕوانامەی بەبێ مۆڵەتی خوێندن پێکهاتوون.

ئاماژەیبەوەشدا: دواتر لێژنەیەک پێكهات لە هەرسێ وەزارەتی (دارایی و ئابووری، پلاندانان، خوێندنی باڵا) كە بە هاوبەشی هەڵسەنگاندنی خۆیان بۆ ئەو بابەت کرد، دوای ئەوەی چەند جارێک گشتاندنیان کرد بۆ وەزارەتەکان و فەرمانگەکان، بەڵام دواجار پڕۆسەکە لە وەزارەتی دارایی و ئابووری وەستێنرا بەچەند هۆکارێک.

لە پەیامەکەشیدا هاتووە: ئێستا ئەنجومەنی وەزیران داوای راپۆرت و پێشنیارەکانی لیژنە هاوبەشەکە دەکات، بۆ ئەوەی لە ئەنجومەنی وەزیران کار لەسەر ئەو بابەتە بکرێت و بڕیاری پێویستی لەبارەوە بدرێت و میکانیزمی جێ بەجێکردنی ئەم پڕۆسەیە دیاری بکریت.

مافپەروەر کامۆ خدر ئەوەشى راگەیاند: بەپێی ئەو زانیاریانەی بەدەستم گەیشتوون جۆری بەدەستهێنانی بروانامەی بێ مۆڵەت  بەم جۆرە :

-بڕوانامەی بەدەستهاتوو بەمۆڵەتی بێ مووچە
-بڕوانامەی بەدەستهاتوو بە مۆڵەتی کۆکراوە
-بڕوانامەی بەدەستهاتوو بە مۆڵەتی هاوەڵی سەفەر
-بڕوانامەی بەدەستهاتوو بە بێ مۆڵەت
--بڕوانامەی بەدەستهاتوو بە مۆڵەتی نەخۆشی
-لەگەڵ چەند پۆلێنکردن و هەڵسەنگاندنێکی دیکە




PUKMEDIA