د. ئارام محەمەد: بڕیاری بەخشینی خوێندکارانمان لە کرێی خوێندن جێبەجێکرد

PUKMEDIA

د.ئارام محەمەد وەزیری خوێندنی باڵاو توێژینەوەی زانستی

وەزیری خوێندنی باڵاو توێژینەوەی زانستی رایدەگەیەنیت: چەمچەماڵ بەتەنها جێناهێڵین و سوپاسی هاووڵاتیان دەکەین، کە بەشدارن لەکەمپینەکان و گەیاندنی هاوکارییەکاندا، دەشڵێت: خوێندکارانی پارالێڵ و ئیوارانمان لەکرێی خوێندنی ئەمساڵ بەخشی و جێبەجێشمانکردووە.

د.ئارام محەمەد وەزیری خوێندنی باڵاو توێژینەوەی زانستی سەردانی چەمچەماڵی کرد و لەکۆنگرەیەکی رۆژنامەوانیدا رایگەیاند: چەمچەماڵ بەتەنها جێناهێڵین و سوپاسی هاووڵاتیان دەکەین کە بەشدارن لەکەمپینەکان و گەیاندنی هاوکارییەکاندا، چەمچەماڵ پێویستی بە هاوکارییە و ئێمەش وەک خوێندنی باڵا بەپیی توانا هەرچیمان پێکردبیت کردوومانە و هیوادارم لەم هاوکارییانەشدا دامەزراوەکانی خوێندنی باڵا فەرامۆشنەکرێن.

راشیگەیاند: پرۆسەی خوێندن لە چەمچەماڵ ئاسایی بووەتەوە و سوپاسی سەرۆکی زانکۆ و پەیمانگەکانیش دەکەم بە حکومی و تایبەتەکانیشەوە کە هەمیشە هاوکارمان بوون و خزمەتێکی باشیان بە پرۆسەی خوێندن لەناوچەکە کردووە، وەک ئاشکرایە لەچەند رۆژی رابردوودا بەهۆی کارەساتەکەوە خوێندکارانی پارالێڵ و ئیوارانمان لەکرێی خوێندنی ئەمساڵ بەخشی و جێبەجێشمانکردووە، کە رەنگە بڕیارەکە کەمێک باری سەرشانی خوێندکاران ئاسان بکات.

هەر لەکۆنگرەکەدا د.ئارام محەمەد وەزیری خوێندنی باڵاو توێژینەوەی زانستی ئاماژەی بەوەشکرد: ئەرکمانە لەم بارودۆخانەدا پێکەوە هاوکاربین، ئەگەر پارێزگاکانی تری هەرێم لەگەل چەمچەماڵ نەبن ئەی کێ لەگەڵیان بێت؟ ئەوەی کردوشمانە با ئازایەتی نازانین و ئەمڕۆ رۆژی هاندانی خەڵکە و چەمچەماڵ پێویستی بەقسەی گەورە نییە، بەڵکو پێویستی بە کرداری گەورەیە، هەربۆیە بە کەم بێت یاخود زۆر بەشداریکردن لەهاوکاریکردنی جێگەی رێز و پێزانینە و داواکارم پرۆسەکەش لەئاستی داخوازی خەڵکت چەمچەماڵ بێت و بەشێوەیەکی شەفاف هاوکارییەکان دابەشبکرێن، چونکە ئەم رووداوە قەبارەی پێویستییەکانی خەڵکی چەمچەماڵی زیاتر پیشاندا.

PUKMEDIA