رێكاره‌كانی هه‌ڵبژاردنی سه‌رۆك كۆمار و پێكهێنانی حكومه‌ت ده‌ستپێده‌كات

PUKMEDIA

بینای ئەنجومەنی نوێنەرانی عیراق

ئه‌مڕ‌ۆ 14ی12ی2025 دادگای باڵای فیدراڵی ئه‌نجامی هه‌ڵبژاردنی ئه‌نجومه‌نی نوێنه‌رانی په‌سه‌ند كرد، به‌مه‌ش رێكاره‌كانی دانیشتنی په‌رله‌مان و پێكهێنانی حكومه‌ت ده‌ستپێده‌كات، سه‌ره‌تاش پێویسته‌ ئه‌نجومه‌نی نوێنه‌ران له‌ماوه‌ی 15 رۆژدا یه‌كه‌م دانیشتنی خۆی رێكبخات.

پێویسته‌ له‌ماوه‌ی15 رۆژدا په‌رله‌مان كۆببێته‌وه‌

دوای په‌سه‌ندكردنی ئه‌نجامه‌كان، سه‌رۆككۆماری عیراق به‌پێی مادده‌ی 54 له‌ ده‌ستووری عیراق داوا له‌ئه‌نجومه‌نی نوێنه‌ران ده‌كات كه‌له‌ ماوه‌ی 15 رۆژدا یه‌كه‌م دانیشتنی خۆی ساز بكات و پێویستیشه‌ به‌ ته‌مه‌نترین په‌رله‌مانتار سه‌رۆكایه‌تی دانیشتنه‌كه‌ بكات، هه‌روه‌ها به‌پێی مادده‌ی 53 دانیشتنه‌كانی په‌رله‌مان به‌ئاشكرا ئه‌نجامده‌درێت و له‌ رێگای ده‌زگاكانی راگه‌یاندنه‌وه‌ بڵاوده‌كرێنه‌وه‌.

 له‌ دانیشتنی یه‌كه‌مدا سه‌رۆكی ئه‌نجومه‌ن و دوو جێگره‌كه‌ی هه‌ڵده‌بژێردرێن

هه‌ر له‌ یه‌كه‌م دانیشتندا، به‌پێی مادده‌ی 55 ئه‌نجومه‌نی نوێنه‌ران سه‌رۆك و دوو جێگره‌كه‌ی هه‌ڵده‌بژێریت، كه‌ پێویسته‌ به‌ زۆرینه‌ی ره‌ها بێت و ده‌نگدانیش به‌نهێنی بێت.
هاوكات به‌پێی مادده‌ی 61 له‌ ده‌ستووری عیراق، كاره‌كانی ئه‌نجومه‌نی نوێنه‌رانی دیاریكردووه‌ كه‌ بریتییه‌ له‌ دانانی پڕ‌ۆژه‌ یاسا، چاودێریكردنی ده‌سه‌ڵاتی جێبه‌جێكردن، هه‌ڵبژاردنی سه‌رۆك كۆمار، رێكخستنی په‌سه‌ندكردنی په‌یماننامه‌ و رێككه‌وتنامه‌ نێوده‌وڵه‌تییه‌كان، ئه‌مه‌ جگه‌ له‌وه‌ی ره‌زامه‌ندی له‌سه‌ر دانانی سه‌رۆك و ئه‌ندامانی دادگای پێداچوونه‌وه‌و سه‌رۆكی داواكاری گشتی و باڵیۆز و خاوه‌ن پله‌ تایبه‌ته‌كان و لێپێچینه‌وه‌ له‌سه‌رۆك كۆمارو به‌خشینی ده‌كات.

 سه‌رۆك كۆمار به‌ئاماده‌بوونی دوو له‌سه‌ر سێی ئه‌ندامانی په‌رله‌مان هه‌ڵده‌بژێردرێت

ئه‌نجومه‌نی نوێنه‌رانی عیراق پێویسته‌ له‌ ماوه‌ی 30 رۆژدا له‌ رۆژی یه‌كه‌می دانیشتنه‌كه‌یه‌وه‌ سه‌رۆكێكی نوێ بۆ عیراق هه‌ڵده‌بژێریت كه‌ دانیشتنی هه‌ڵبژاردنی سه‌رۆككۆمار، به‌ ئاماده‌بوونی دوو له‌سه‌ر سێی په‌رله‌مانتاران ده‌بێت، واته‌ پێویسته‌ له‌ 329 ئه‌ندامی په‌رله‌مان 220 په‌رله‌مانتار ئاماده‌ بن، هه‌روه‌ها به‌پێی مادده‌ی 70 له‌ ده‌ستووری عیراق، ئه‌نجومه‌نی نوێنه‌ران به‌ زۆرینه‌ی دوو له‌سه‌ر سێ، كاندیدی سه‌رۆكایه‌تی كۆمار هه‌ڵده‌بژێرێت، خۆ ئه‌گه‌ر یه‌كێك له‌ كاندیده‌كان له‌گه‌ڕ‌ی یه‌كه‌م ده‌نگی زۆرینه‌ی نه‌هێنا، ئه‌وا له‌ گه‌ڕ‌ی دووه‌می هه‌ڵبژاردندا، ئه‌و كاندیده‌ی زۆرینه‌ی ده‌نگی هێنا، ئه‌وا وه‌ك سه‌رۆككۆمار هه‌ڵده‌بژێردرێت.

گه‌وره‌ترین فراكسیۆنی په‌رله‌مانی حكومه‌ت پێكده‌هێنێت

هاوكات، سه‌رۆككۆماری نوێ له‌ ماوه‌ی 15 رۆژدا به‌پێی مادده‌ی 76 ی ده‌ستوور گه‌وره‌ترین فراكسیۆنی په‌رله‌مانی دیاریده‌كات بۆ ئه‌وه‌ی كابینه‌ی نوێی حكومه‌ت پێكبهێنیت، هه‌روه‌ها پێویسته‌ سه‌رۆكوه‌زیرانی راسپێردراو بۆ پێكهێنانی حكومه‌ت له‌ ماوه‌ی 30 رۆژدا ناوی وه‌زیر و به‌رنامه‌ی حكومی بداته‌ ئه‌نجومه‌نی نوێنه‌ران، بۆ ئه‌وه‌ی متمانه‌ی په‌رله‌مان وه‌ربگرن، كه‌ جیا به‌جیا ده‌بێت، خۆ ئه‌گه‌ر له‌ ماوه‌ی دیاریكراودا سه‌رۆكوه‌زیرانی راسپێردراو بۆ پێكهێنانی حكومه‌ت نه‌یتوانی كابینه‌كه‌ی پێكبهێنیت، ئه‌وه‌ كات ده‌درێت به‌سه‌رۆككۆمار كه‌ له‌ماوه‌ی 15 رۆژدا كه‌سێكی دیكه‌ بۆ پێكهێنانی حكومه‌ت راده‌سپێرێت.

ئەمەش لەکاتێکدایە، رۆژی 11ی11ی2025، هەڵبژاردنی ئەنجومەنی نوێنەرانی عیراق بەڕێوەچوو، دواتریش کۆمسیۆنی باڵای سەربەخۆی هەڵبژاردنەکانی عیراق ئەنجامی کۆتایی هەڵبژاردنی خولی شەشەمی ئەنجومەنی نوێنەرانی عیراقی راگەیاند و بەپێی ئەنجامەکان یەکێتیی نیشتیمانیی کوردستان توانیی ژمارەی دەنگەکانی زیاد بکات و 18 کورسی پەرلەمان بۆ خۆی مسۆگەر بکات.

PUKMEDIA