لەزانكۆیەكی ئەمریكا 2 كەس كوژران و 8ی دیكەش برینداربوون

شوێنی رووداوە

رۆیتەرز

لەڕووداوێكی تەقەكردندا لەزانكۆی براون لەویلایەتی رۆد ئایلەندی ئەمریكا،  چەكدارێك دەستڕێژی گوللەی كرد و بەهۆیەوە 2 كەس كوژران و 8 كەسی دیكەش برینداربوون، سەرۆكی ئەمریكاش دەڵێت: تەنها دەتوانین نزا بۆ قوربانییەكان بكەین.

ئاژانسی هەواڵی ئەسۆشیەیتد پرێس رایگەیاند: رۆژی شەممە 13ی 12ی 2025، لەزانكۆی براون چەكدارێكی جل رەش كە تائێستا دەستگیرنەكراوە، دەستڕێژی گوللەی لە خوێندكاران كرد كە سەرقاڵی تاقیكردنەوەكانی كۆتایی ساڵ بوون و بەهۆیەوە 2 كەس كوژران و 8 كەسی دیكەش برینداربوون، لەئێستاشدا هێزەكانی پۆلیس سەرقاڵی پشكنینی باڵەخانەكانی زانكۆكە و دەوروبەرین.

هاوكات تیمۆسی ئۆهارا، جێگری بەڕێوەبەری پۆلیس رایگەیاند: گومانلێكراوەكە لەكاتی چوونەدەرەوەی لەباڵەخانەی ئەندازیاری بینراوە كە هێرشەكەی تێدا رویداوە، لەلایەكی دیكەوە، برێت سمایلی، سەرۆكی شارەوانیی پرۆڤیدنس رایگەیاند: رێكاری قەدەغەی هاتووچۆ لەناوچەكەدا راگەیەندراوە و داوای لەدانیشتووانی نزیك زانكۆكە كردووە لە ماڵەكانیان بمێننەوە تاوەكو رێكارەكە هەڵدەگیرێت.

سەرۆكی شارەوانی وتیشی: هەموو توانایەكیان خستۆتەگەڕ بۆ دۆزینەوەی گومانلێكراوەكە، هەروەها ئاماژەی بەوەشكرد كە ئەو 8 كەسەی برینداربوون لەژێر چاودێریی پزیشكیدان و دۆخیان سەقامگیرە، بەڵام رەتی كردەوە زانیاری لەبارەی ئەوەی قوربانییەكان خوێندكارن یان نا، ئاشكرا بكات.

هاوكات دۆناڵد ترەمپ، سەرۆكی ئەمریكا، لە لێدوانێكی كورتدا لە كۆشكی سپی، رایگەیاندووە: لەئێستادا تەنها دەتوانین نزا بۆ قوربانییەكان بكەین.

PUKMEDIA