گفتوگۆی خۆپیشاندەرانى گوندى لاجان و بەرپرسانی ئەمنی شکستی هێنا

المسرى

دیمەنێکى ئاڵۆزییەکانى گوندى لاجان

پەیجى میدیایى ئاپۆڕا نیوزى نزیک لە حزبى زەحمەتکێشنانى کوردستان رایگەیاند: بەگوێرەی وتەی سەرچاوەیەکی تایبەت کە لەناو گوندی لاجانەوە قسەى بۆمانکردووە و نەیویست ناوی ئاشکرابکرێت، ئەوەیخستوەتەڕوو: لەدوای وەستانی شەڕ و پێکدادانەکان لە ئێستادا هێزێکی زۆری ئەمنی لە چواردەورەی گوندی لاجان بڵاوەیان پێکراوە و رێگای سەرەکی هەولێر ـــ گوێڕیش داخراوە و رێگا نادەن هیچ کەسێکیش بۆ ناو گوندەکە بچێت.

پەیجى میدیاى ئاپۆڕا نیوز ئەوەشی ئاشکرا کردووە: ئێوارەی ئەمڕۆ لە نێوان نوێنەری خۆپیشاندەرانی گوندی لاجان و بەرپرسانی ئەمنی لە هەولێر کۆبونەوەیەک ئەنجامدراوە، بەڵام کۆبونەوەکە شکستی هێناوە و هێزە ئەمنیەکان رەتیانکردوەتەوە ئەو کەسەی کە دەستگیرکراوە ئازادی بکەن. 

لە بڵاوکراوەکەى ئاپۆڕا نیوز ئاماژەبەوەشدراوە: بەهۆی شکستهێنانی کۆبونەوەکە پێیان وتراوە( ژن و منداڵەکان لەماڵەکاندا دوربخەنەوە و لەبەرامبەر یەکتردا دەوەستین). 

هاوکات ئەوەشخراوەتەڕوو: لەئێستادا هێڵی ئینتەرنێت و کارەبای گوندەکە بەتەواوەتی بڕدراوە و هێزێکی زۆری بێشوماری ئەمنی هاتونەتە نزیک گوندەکە و هەرکیەکانی ئەوسنورەش لە حاڵەتی ئامادەباشی تەواودان.

هەر بە پێى بڵاوکراوەکەى میدیاى ئاپۆڕا نیوزى نزیک لە حزبى زەحمەتکێشانى کوردستان، نیوەڕۆی ئەمڕۆ شەممە 29\11\2025 بەهۆی دەستگیرکردنی کەسێک کە لەخۆپیشاندانی پێنج شەممەی رابردوو بەشدارببو، جارێکی دیکە دانیشتوانی گوندی لەبەردەم کۆمپانیای لاناز خۆپیشاندان دەستی پێکرد و رێگای سەرەکی هەولێر ـــ گوێڕ بەتەواوی داخرا، دواتر گرژی و ئاڵۆزی لەنێوان خۆپیشاندەران و پاسەوانانی کۆمپانیاکە دروستبوو، بەهۆی تەقەی هەڕەمەکی ئەوهێزە کەسێک کوژرا و نزیکەی 10کەسی دیکەش برینداربوون کە برینی چەند کەسێکیان سەختە.

PUKMEDIA