قۆناغی دووەمی پڕكردنەوەی فۆڕمی ئەلیكترۆنی پسووڵەی خۆراك دەستپێدەكات

بەڕێوەبەرايەتی گشتیی بازرگانی هەرێم

فۆڕمی ئەلیكترۆنی پسووڵەی خۆراك

بەڕێوەبەری گشتیی بازرگانی هەرێم رایدەگەیەنێت، لەمساڵدا قۆناغی دووەمی پڕكردنەوەی فۆڕمی ئەلیكترۆنی پسووڵەی خۆراك دەستپێدەكات و هاووڵاتیان دەتوانن منداڵی تازە لەدایكبوو تۆمار بكەن و نوێكردنەوەش بەردەوام دەبێت.

نەوزاد شێخ كامل، بەڕێوەبەری گشتیی بازرگانی هەرێم، رایگەیاند: نوێترین ئاماری پڕكردنەوەی پسووڵەی خۆراك لەلایەن هاووڵاتیانی هەرێمی كوردستانەوە گەیشتووەتە 93.91% ئەمەش رێژەیەكی باشە و لە قۆناغەكانی ئایندەدا ئەو كەمتر 7% ی ماون كەڕێژەكەیان نزیكەی 294 هەزار كەس دەبێت، دەتوانن پسووڵەی خۆراكەكانیان پڕكەنەوە.

راشیگەیاند: هەر لەمساڵدا دەستبە قۆناغی دووەم دەكەین كە بریتییە لە زیادبوونی منداڵ و تۆماركردنیان، گواستنەوەی پسوڵەی خۆراك لە شار یان گەڕەكێك بۆ گەڕەكێكی دیكە، خۆتۆمار كردنی ئەو كەسانەی لە قۆناغی یەكەمدا كارتی نیشتمانیان تەواو نەبوو بوو، دەتوانن هەر بە مۆبایلەكانیان فۆڕمی داكاری پڕبكەنەوە و نوێكردنەوەش بەردەوام دەبێت.

بەڕێوەبەری گشتیی بازرگانی هەرێم، لەبارەی پڕكردنەوەی پسووڵەی خۆراك لە سەر ئاستی پارێزگاكان رایگەیاند: تا ئێستا لە پارێزگای هەولێر 94.14%، لە پارێزگای سلێمانی 93.68%، لە پارێزگای دهۆك 93.67% و لە پارێزگای هەڵەبجە 96.80% ی هاووڵاتیان پسووڵەی خۆراكیان پڕكردووەتەوە.

PUKMEDIA