هەفتەی داهاتوو عیراق مووچە بۆ هەرێم دەنێرێت

PUKMEDIA

لۆگۆی حکومەتی هەرێم و وەزارەتی دارایی و دراوی عیراقی

چاوەڕوان دەكرێت هەفتەی داهاتوو حكومەتی عیراق مووچەی مانگی 9 بۆ هەرێم بنێرێت، لەكاتێكدا مووچەخۆرانی عیراق مووچەی مانگی 11 وەردەگرن، بەڵام مووچەخۆرانی هەرێم تائێستا مووچەی دوو مانگیان بەنادیاریی ماوەتەوە.

سەرچاوەیەك لە وەزارەتی دارایی حكومەتی هەرێمی كوردستان بە PUKMEDIA ی راگەیاند: چاوەڕواندەكرێت تاكۆتایی ئەم هەفتەیە وەزارەتی دارایی بڕی 120 ملیار دینار وەك داهاتی نانەوتی مانگی 9 بنێرێت بۆ عیراق، هەروەها وەزارەتی دارایی عیراقیش لەهەفتەی داهاتوودا مووچەی مانگی 9 بۆ هەرێم بنێرێت.

ئەمەش لەكاتێكدایە لەهەفتەی داهاتووەوە دابەشكردنی مووچەی مانگی 11 لەعیراق دەستپێدەكات، بەڵام لەهەرێم چاوەڕوانییەكان بۆ مووچەی مانگی 9 یە، بەو پێیەش تائێستا مووچەی دوو مانگی مووچەخۆرانی هەرێم بەنادیاریی ماوەتەوە.

جگە لەناردنی بڕی 120 ملیار دینار پێویستە حكومەتی هەرێم حساباتی پێداچوونەوەی مانگی 9 بۆ عیراق بنێرێت، پاشان حكومەتی عیراق مووچە دەنێرێت، هەرچەندە محەمەد شیاع سودانی سەرۆكوەزیرانی عیراق و تەیف سامی وەزیری دارایی عیراق لەئێستادا لە هەرێمی كوردستانن و چاویان بەكاربەدەستانی حكومەتی هەرێم كەوتووە، بەڵام لەلایەن كاربەدەستانی حكومەتی هەرێمەوە هیچ گفتوگۆیەك لەسەر ناردنی مووچەی مانگی 9 و مانگەكانی دیكە لەكۆبوونەوەكاندا نەكراوە.

ساڵی رابردووش مووچەخۆرانی هەرێمی كوردستان مووچەی مانگی 12یان فەوتاو تائێستا وەریاننەگرتووە، بۆیە دەترسن هەمان سیناریۆی ساڵی رابردوو بەخراپترەوە دووبارە ببێتەوەو مووچەی دوو مانگیان بفەوتێت.

PUKMEDIA