سكرتاریه‌تی سه‌رۆك مام جه‌لال چه‌ند خوێندنگایه‌ك له‌ شارباژێڕ نۆژه‌نده‌كاته‌وه‌

PUKMEDIA

وێنەیەکى کۆنگرە رۆژنامەوانیەکە

سكرتارییه‌تی سه‌رۆك مام جه‌لال چه‌ند خوێندنگایه‌ك له‌ شارباژێڕ نۆژه‌نده‌كه‌نه‌وه‌ و به‌ڕێوه‌به‌ری په‌روه‌رده‌ی شارباژێڕیش ده‌ڵێت: به‌رده‌وامده‌بین له‌ خزمه‌تكردنی منداڵانی ناوچه‌كه‌مان و خه‌ڵكی شارباژێڕ شایسته‌ی خزمه‌تی زیاترن.

نوێنه‌رێك له‌ سكرتارییه‌تی سه‌رۆك مام جه‌لال له‌ كۆنگره‌یه‌كی رۆژنامه‌وانیدا، رایگه‌یاند: نۆژه‌نكردنه‌وه‌ی خوێندنگاكان و دابینكردنی پێداویستییه‌كانیان ئه‌ركی حكومه‌تی هه‌رێمی كوردستانه‌، به‌ڵام كه‌ ئه‌وان پێداویستییه‌كانی خوێندن و خوێندنگاكان دابین نه‌كه‌ن، ئێمه‌ " سكرتاریه‌تی سه‌رۆك مام جه‌لال، به‌بڕیاری قوباد تاڵه‌بانی"، له‌ هه‌ر جێیه‌كی كوردستان داوای هاوكاریمان لێبكرێت، به‌پێی توانا هه‌وڵده‌ده‌ین كێشه‌كانیان چاره‌سه‌ر بكه‌ین و پێداویستییه‌كانیان بۆ دابین بكه‌ین، نۆژه‌نكردنه‌وه‌ی خوێندنگای ته‌گه‌رانیش هه‌ر له‌و چوارچێوه‌یه‌دا بووه‌ و له‌سه‌ر بودجه‌ی سكرتاریه‌تی سه‌رۆك مام جه‌لال بووه‌ و هاوكاری خوێندنگای زه‌لانیشمان كردووه‌ و له‌ داهاتووشدا هاوكاری خوێندنگای كه‌ناروێ ده‌بین و نۆژه‌نیده‌كه‌ینه‌وه‌ و پێداویستییه‌كانیان بۆ دابین ده‌كه‌ین.

هه‌رو له‌و باره‌یه‌وه‌ له‌تیف حوسێن به‌ڕ‌ێوه‌به‌ری په‌روه‌رده‌ی شارباژێر له‌ كۆنگره‌یه‌كی رۆژنامه‌وانیدا، دوای سوپاسكردنی قوباد تاڵه‌بانی و سكرتارییه‌تی سه‌رۆك مام جه‌لال، رایگه‌یاند: خوێندنگای ته‌گه‌ران دووه‌مین ناوه‌ندی خوێندنه‌ كه‌ نۆژه‌نیده‌كه‌نه‌وه‌ له‌كاتێكدا حكومه‌ت نه‌توانێت پێداویستی و كه‌م و كورتییه‌كان چاره‌سه‌ر بكات، ئێمه‌ ناچارین په‌نا بۆ لایه‌نی دیكه‌ به‌رین، وه‌كو هانا بردن بۆ سكرتارییه‌تی سه‌رۆك مام جه‌لال، كه‌ ئه‌مجاره‌ هانامان بۆ بردن و ئه‌وانیش به‌ ده‌م داواكارییه‌كانمانه‌وه‌ هاتن و چه‌ند خوێندنگایه‌كیان نۆژه‌نكردوه‌ته‌وه‌ و پێداویستیان بۆ دابین كردووه‌ و له‌ داهاتوویه‌كی نزیكیشدا له‌ سنوری كه‌ناروێ خوێندنگایه‌ك نۆژه‌نده‌كرێته‌وه‌ و پێداویستییه‌كانی دابین ده‌كه‌ن.
 
راشیگه‌یاند: هه‌وڵه‌كانمان بۆ باشتركردنی خوێندن له‌ سنووری شارباژێڕ به‌رده‌وامیی ده‌بێت، چونكه‌ ئه‌م ناوچه‌یه‌ جگه‌ له‌وه‌ی لانكه‌ی شۆڕشی نوێ بووه‌، هه‌مووكات پشتیوانی شۆڕشه‌كان بووه‌ و به‌و هۆیه‌شه‌وه‌ زیانی زۆریان پێگه‌یشتووه‌ و له‌ئێستادا ئه‌ركی ئێمه‌یه‌ خزمه‌تی زیاتریان بكه‌ین.

PUKMEDIA