کۆمسیۆن: 102 سکاڵا لە دەنگدانی تایبەت و گشتی تۆمار کراوە

PUKMEDIA

پرۆسەی دەنگدان

ژمارەی سکاڵای تۆمار کراوە لە دەنگدانی  تایبەت و گشتی گەیشتە 102 سکاڵا و وتەبێژی کۆمسیۆنی باڵای سەربەخۆی هەڵبژاردنەکانییش ئاشکرای دەکات: زۆرینەی سکاڵاکان لە جۆری زەردن.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق، لە لێدوانێکیدا بە PUKMEDIA ی راگەیاند: تاوەکو ئێستا 102 سکاڵا لەسەر بەڕێوەچوونی هەڵبژاردنی تایبەت و گشتی تۆمار کراوە.

ئاماژەی بەوەشکرد:43 سکاڵایان بۆ رۆژی دەنگدانی تایبەت بووە و 59 سکاڵاش بۆ دەنگدانی گشتی بووە.

 پەیوەست بە جۆری سکاڵاکان، جومانە غەلای ئاشکرای کرد، زۆرینەی سکاڵاکان لە جۆری زەردن و کەمێکی لە جۆری سەوزە.

سکاڵای جۆری سەوز زیاتر روکەشییە و دەکرێت راستەوخۆ رەتبکرێتەوە، هەروەها سکاڵای جۆری زەرد زیاتر لەسەر بوونی بانگەشەی هەڵبژاردن لە نزیک وێستگەکانی دەنگدان تۆمار دەکرێت، یان لەسەر پێشێلکاری یاساکانی کۆمسیۆنە لەلایەن هێزە ئەمنییەکانەوە تۆمار دەکرێت و کاریگەریان لەسەر ئەنجامەکان نابێت.

ئەمەش لەکاتێکدایە، رۆژی 9ی 11ی 2025، هەڵبژاردنی تایبەت بۆ خولی شەشەمی ئەنجومەنی نوێنەرانی عیراق بەڕێوەچوو کە تیایدا ملیۆنێك و 313 هەزار و 980 ئەندامی هێزە ئەمنییەكان مافی بەشداریكردنیان لە دەنگدانی تایبەتدا هەبوو،هەروەها رۆژی 11ی11ی2025،  دەنگدانی گشتی بەڕێوەچوو، کە دەنگدەران لە كۆی حەوت هەزار و 700 كاندید 329 كاندید دەكەنە ئەندامی ئەنجومەنی نوێنەرانی عیراق.

PUKMEDIA