کۆمسیۆن رێژەى دەنگدانی بۆ خولی شەشەمی ئەنجومەنی نوێنەران راگەیاند

PUKMEDIA

پرۆسەی جیاکردنەوەی دەنگەکان

کۆمسیۆنی باڵای سەربەخۆی هەڵبژاردنەکانی عیراق لەئامارێکدا، رێژەی بەشداری دەنگدەران و ژمارەی دەنگدەرانی بۆ خولی شەشەمی ئەنجومەنی نوێنەرانی عیراق بڵاوکردەوە، بەپێی ئامارەکە، کۆی گشتی ژمارەی دەنگدەران بە تایبەت و گشتییەوە زیاتر لە 12 ملیۆن دەنگدەر بووە، بەوپێیەش رێژەی بەشداریی %55 تێدەپەڕێنێت.

هەر لە ئامارەکەدا، کۆمسیۆن ژمارەی دەنگدەرانی بۆ دەنگدانی گشتی راگەیاند ، کە گەیشتووەتە 10 ملیۆن و898هەزار و 327 دەنگدەر، لەکۆی 20 ملیۆن 63 هەزار و 773 دەنگدەر، بەمەش رێژەی بەشداری دەنگدان زیاترە لە%55.

سەبارەت بە ژمارەی دەنگدەرانی تایبەت بۆ هێزە چەکدارەکان و هێزە ئەمنییەکان، کە لەڕۆژی 9ی تشرینی دووەمی 2025 بەڕێوەچوو، ژمارەی دەنگدەران گەیشتە ملیۆنێک و 84 هەزار و 289 لەکۆی ملیۆنێک و 313 هەزار و 980 دەدنگدەر، بەمەش ریژەی بەشداری دەنگدان گەیشتە %82.5.

کۆمسیۆنی باڵای سەربەخۆی هەڵبژاردنەکانی عیراق، سەبارەت بە دەنگی ئاوارەکان، ئاماژەی بەوەکردووە، لە کۆی 26 هەزار و 538 دەنگدەر گەیشتە 20 هەزار و 527 دەنگدەر، بەمەش رێژەی بەشداری دەنگدان گەیشتە %77.

هەر لە ئامارەکەدا کۆمسیۆنی باڵای سەربەخۆی هەڵبژاردنەکانی عیراق، کۆی گشتیی دەنگدەرانی دوو رۆژی دەنگدانی گشتی و تایبەتی ئاشکراکرد کە 12 ملیۆن و 3 هەزار و 143 دەنگدەر بووە، لەکۆی 21 ملیۆن و 404 هەزار و 291 دەنگدەر، بەمەش رێژەی بەشداری دەنگدان گەیشتە زیاتر لە 55%.

یەكێتی لەسلێمانی و كەركوك و هەڵەبجەو راپەڕین و كۆیەو گەرمیان هێزی یەكەمە

بەپێی ئەنجامە ناڕەسمییەكان یەكێتیی نیشتمانیی كوردستان لە پارێزگای سلێمانی بەڕێژەیەكی بەرچاو دەنگی لە پێش دەنگی لایەنەكانی دیكەوەیە و جیاوازییەكی زۆری لەگەڵ لایەنەكاندا هەیە، هاوکات لە گەرمیان-یش دەنگێكی زۆری بەدەستهێناوە و ركابەری نییە.

بەپێی زانیارییەكانی PUKMEDIA، یەكێتیی نیشتمانیی كوردستان لە پارێزگای هەڵەبجە جگە لەوەی هێزی یەكەمە، رێژەی دەنگەكانیشی بەشێوەیەكی بەرچاو هەڵكشاوە، هەروەها لەشاری كۆیە دەنگەكانی یەكێتی بەشێوەیەكی بەرچاو ركابەرەكانی جێهێشتووە و یەكەمی شارەكەیە، ئەمە جگە لەوەی سەركەوتنی یەكێتیی نیشتمانیی كوردستان لە دەڤەری راپەڕین بێوێنەیە و یەكەمی حزبەكانە و جیاوازییەكی زۆری لەگەڵ لایەنەكانی دیكەدا هەیە.

بەگشتی دەنگەكانی یەكێتیی نیشتمانیی كوردستان لەناوچە جێناكۆكەكان بەرزبوونەوەی زۆری بەخۆیەوە بینیوە و لە پارێزگای كەركوك یەكەمە و لەناو حزبە كوردستانییەكاندا ركابەری نییە، هەروەها لە خانەقین و خورماتوو دەنگەكانی یەكێتی هەڵكشاوە و لە خانەقین یەكەمە.

لە پارێزگای نەینەوا یەكێتی كە لە چوارچێوەی هاوپەیمانێتی (یەكێتی خەڵكی نەینەوا) بەشداری هەڵبژاردنی كردبوو، دەنگی زۆری بەدەستهێناوە و چاوەڕوان دەكرێت دەنگی زیاتریش بەدەستبهێنێت.

بەپێی ئەنجامە ناڕەسمییەكان، یەكێتی لە هەولێر هێزی دووەمە و دەنگەكانیشی لە هەڵكشاندایە، ئەمە جگە لەوەی لەبەشێك لە شارۆچكەكانی پارێزگای دهۆك یەكێتی هێزی دووەمە و دەنگی زۆری بەدەستهێناوە.

ئەمەش لەکاتێکدایە، یەكێتیی نیشتمانیی كوردستان بۆ هەڵبژاردنی ئەنجومەنی نوێنەرانی عیراق، بە زیاتر لە 150 كاندید لە هەشت پارێزگای عیراق بەشداری كرد و لەپارێزگای نەینەوا-ش لەچوارچێوەی یەكێتی خەڵكی نەینەوا-دا بە ژمارە 281 بەشداربوو كە  31 كاندیدی هەبوو.

PUKMEDIA