وەزیرى داد و پارێزگارى کەرکوک: سەقامگیرى و پێکەوەژیان بەردەوامى پێبدەن

PUKMEDIA

کۆنگرەى رۆژنامەوانى خالید شوانى وەزیرى دادى عیراق و رێبوار تەها پارێزگارى کەرکوک

وەزیرى دادى عیراق رایگەیاند: داوا لە سەرجەم ئەو جوتیارانە دەکەین، کە زەوییەکانیان بڕیارى 29 دەیانگرێتەوە، سەردانى فەرمانگەى تۆمارى خانووبەرە بکەن، بۆ ئەوەى رێکارەکانى گەڕانەوەى زەوییەکانیان ئەنجامبدەن و بیکەنەوە بەناوى خۆیانەوە و لەگەڵ پارێزگارى کەرکوک ئەوەیانخستەڕوو: داوا لە کۆمەڵانى خەڵک دەکەین ئەو سەقامگیرییەى ئەمڕۆ لە کەرکوک هەیە، بە هەموو پێکهاتەکانەوە بیپارێزن.

خالید شوانى: دەنگ بەو هێزە بدەن سەقامگیرى کەرکوکى پاراستووە

ئەمڕۆ خالید شوانى وەزیرى دادى عیراق لە کۆنگرەیەکى رۆژنامەوانیدا ئەوەی روونکردەوە: داواکارین لە هاووڵاتییانى کەرکوک دەنگەکانیان بەو ئاڕاستەیە بێت، ئایندەییەکى باش بۆ هاووڵاتییانى کەرکوک مسۆگەر بێت و ئەم بارودۆخە سەقامگیرە لە رووى سیاسى و ئابوورى و کۆمەڵایەتییەوە لە کەرکوک دروستبووە، بەردەوام بێت و متمانە بە ئەو هێزە بکەن، کە جێى بیرو باوەڕى ئەوانە، ئەو هێزەى کە لە پێناو کارى پێکەوەیى و قوڵکردنەوەى بنەماکانى برایەتى و پێکەوە ژیان لە نێوان پێکهاتەکان  کاردەکات و ئەو هێزانەى کە دوورکەوتونەوە لە ململانێى سیاسى، نەتەوەیى و تائیفى و ئاڵۆز کردنى بارودۆخى کەرکوک،  ئەو هێزانەى کاریان کردووە بۆ ئەوەى برایەتى لە کەرکوک قوڵ بکرێتەوە و خزمەتگوزارى زیاتر پێشکەش بکرێت و داهاتوویەکى باشتر بۆ دانیشتوانى شارى کەرکوک بۆ هەموو پێکهاتەکانى شارى کەرکوک بە بێ جیاوازى دەستەبەربکەن.

راشیگەیاند: دەنگدان ئەمانەتێکى گەورەییە، ئێمە دەتوانین بڕیارى لێ بدەین، وەکو خەڵکى کەرکوک بە چ ئاڕاستەیەک بارودۆخى کەرکوک بڕوات، بە ئاڕاستەى سەقامگیرى و یەکتر قبوڵکردن و بە ئاڕاستەى داهاتوویەکى باشتر یاخود بە پێچەوانەوە.

ئاماژەى بەوەشدا: ئێمە دڵنیاین دەنگدەرانى کەرکوک بەو ئاڕاستەیە دەڕۆن کە بەرژەوەندى داهاتووى شارى کەرکوک بڕیاردەدەن و ئەو بارودۆخەى ئێستاى شارى کەرکوک کە لە ئارادایە لە کەرکوک دەیپارێزن، بەڵکو بەهێزتریشى دەکەم چونکە تەنها و تەناها ئەمە ڕێگا راستەکەیە، بۆئەوەى داهاتووى هەموو کەرکووکییەکان بە هەموو پێکهاتەکانەوە زامن بکرێت.

خالید شوانى وەزیرى دادى عیراق ئەوەشى روونکردەوە: داواکارین لە هەموو دەنگدەران و هاووڵاتییانى شارى کەرکوک و هەموو کەرکوکیە سەربەرزەکان، کە چۆن پڕۆسەى هەڵبژاردنەکان لە ساڵانى رابردوودا بە هێمنى و ئارامى رۆیشتووە، هەڵبژاردنى سبەینێش بە هێمنى و ئارامی بەڕێوەبچێت و هاوکارى یەکتر و هێزە ئەمنییەکان بکەن، بۆ ئەوەى پێکەوە ئەم پڕۆسە مێژووییەى سبەینێش بەڕێبکەین و جارێکى دیکە متمانە بە ئەو هێزانە بکەنەوە، کە هێز و سەنگ و قورسایى ئەوان بن، لەناو ئەنجومەنى نوێنەرانى عیراقەوە بەرگرى لە کەرکوک و کەرکوکییەکان بکەن.

رێبوار تەها: ئەم سەقامگیرییەى ئەمڕۆى کەرکوک بپارێزن

هەر لە کۆنگرەکەدا رێبوار تەها پارێزگارى کەرکوک رایگەیاند: هەموو هێزە ئەمنییەکان دابەشکراون بەسەر بنکەکانى دەنگدان و داوا لە کۆمەڵانى خەڵک دەکەم ئەو سەقامگیرییەى ئەمڕۆ لە کەرکوک هەیە، بە هەموومان پێکەوە بتوانین بیپارێزین و ئەم پڕۆسەیە سبەینێ کۆتایى دێت و دواى  ئەوە بەردەوام دەبینەوە لە خزمەتکردنى کۆمەڵانى خەڵک.

د.خالید شوانى: ئەو زەویانەى بڕیارى 29 دەیانگرێـتەوە، خاوەنەکانیان دەتوانن زەوییەکانیان بگەڕێننەوە

د.خالید شوانى وتیشى : یەکێک لەو پرسانەى لە کەرکوک لە ساڵى حەفتاکانەوە، بەدەستییەوە دەناڵێنن، کێشەى زەویە کشتوکاڵییەکانى جوتیارانى شارى کەرکوکە بە کورد و تورکمان و هەندێک لە پێکهاتەى عەرەبیش، بە ناحەق لەسەردەمى رژێمى پێشوو لیژنەى شئونى شیمال هەبووە و بەشێوەیەکى نا یاسایی ئەم زەوییە کشتوکاڵیانەى ئیتفاکردووە، کە لە جوتیارە رەسەنە کورد و تورکمان و عەرەبەکانى سەندۆتەوە و خستویەتیە ناو دام و دەزگاکانى دەوڵەتەوە و دواتر مامەڵەى تریشى لەسەر کراوە، ئەمە بۆتە یەکێک لەو پرسانەى لە 2003 وە قسەى لەسەر دەکرێت و چەندین یاسا و بڕیارى لە لایەن حکومەتى فیدڕاڵییەوە بۆ دەرکراوە، کۆتا بڕیار لە ساڵى 2012 دەرکراوە و کە بە بڕیارى 29 ناسراوە کەرکوکییەکان پێى ئاشنان، کە ئەو بڕیارەیە کە زەویە کشتوکاڵیەکانى ناوچەکانى دوبز و سەرگەڕان و خەرابەرووت و ساڵەیى و شوان و قەرەهەنجیر و لەیلان و داقوق و تۆبزاواى لە خاوەنەکانیان سەندۆتەوە، بۆیە لە ساڵى 2012 کە لە لایەن حکومەتى فیدڕاڵییەوە ئەم بڕیارە هەڵوەشێنرایەوە.

ئاماژەیبەوەشدا: لەماوەى 13 ساڵى رابردوودا لەوەزارەتى داد ئەم بڕیارە پەکى کەوتبوو، بە هەندێک هۆکارى فەنى و سیاسى بڕیارەکە نەچوووبوە بوارى جێبەجێکردنەوە و ئێمە لە ماوەى دوو ساڵى رابردوودا زۆر بە وردى کارمان لەسەر ئەم پرسە کرد و دواى وەرگرتنى رەزامەندى وەزارەتە تایبەتمەندەکان.

خالید شوانى وەزیرى دادى عیراق ئەوەشى راگەیاند: داوا لە سەرجەم ئەو جوتیارانە دەکەین، کە زەوییەکانیان بڕیارى 29 دەیانگرێتەوە، دواى تەواوبوونى پشوو، دەتوانن بچن سەردانى فەرمانگەى تۆمارى خانووبەرە بکەن، بۆ ئەوەى رێکارەکانى گەڕانەوەى زەوییەکانیان ئەنجامبدەن و بیکەنەوە بەناوى خۆیانەوە، هەروەها داوا لە جوتیاران دەکەم  پشوو درێژ بن، چونکە ئەم پڕۆسەیە درێژمەودایە.

باسیلەوەشکرد: هەندێک ناوچە ناکۆکى و کێشەى لەسەرە، بۆ چارەسەرکردنى ئەو کێشانەش لیژنەیەکى باڵا هەیە، بە سەرۆکایەتى پارێزگارى کەرکوک رێبوار تەها دامەزراوە.

لە کۆتا وتەکانیدا ئەوەى راگەیاند: بۆیە ئەم پرسەمان راگەیاندووە، بۆ ئەوەى هاووڵاتییان بچن بۆ شوێنى مەبەست و زەویەکانیان بکەنەوە بە ناوى خۆیانەوە.

PUKMEDIA