کۆمسیۆنی باڵای هەڵبژاردنەکانی عیراق: بانگەشە کۆتایی دێت

PUKMEDIA

کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق سەعات 7:00ی بەیانی رۆژی شەممەی وەک دوا وادەی بانگەشەی هەڵبژاردنی خولی شەشەمی ئەنجومەنی نوێنەرانی عیراق داناوە و رایدەگەیەنێت کە هەموو ئامادەکارییەک بۆ پڕۆسەکە ئەنجامدراوە.

سەرچاوەیەکی تایبەت لە کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتی نیشتمانیی کوردستان PUKMEDIA ی راگەیاند: ئامێر و پێداویستی تەواو بەسەر بنکەکاندا دابەشکراوە و سەعات 7:00ی بەیانی رۆژی شەممە بانگەشە کۆتایی دێت و 29 ملیۆن و 262 هەزار و 588 دەنگدەریش لەسەرانسەری عیراق هەیە، بەڵام لەو ژمارەیە 21 ملیۆن و 404 هەزار و 291 کەس هەڵگری کارتی بایۆمەترین و مافی بەشداریکردنیان لە پڕۆسەکە هەیە واتە 73%ی کۆی گشتی دەنگدەران.

سەرچاوەکە باسی لەوەشکرد: ژمارەی دەنگدەرانی گشتی لەم هەڵبژاردنە 20 ملیۆن و 63 هەزار و 733 کەسە و ژمارەی دەنگدەرانی دەنگدانی تایبەتیش ملیۆنێک و 313 هەزار و 980 کەسە، هەروەها لە تەواوی عیراق هەشت هەزار و 703 ناوەندی دەنگدان و 39 هەزار و 285 وێستگەی دەنگدانی گشتی هەیە، لەهەمان کاتیشدا 809 ناوەندی دەنگدانی تایبەت و چوار هەزار و 501 وێستگەی دەنگدانی تایبەت هەیە.

PUKMEDIA