ئەدهەم بارزانی: دەنگ بدەن بەو کاندیدانەی هێژا بافڵ جەلال تاڵەبانی دیاری کردون

PUKMEDIA

سەرۆک بافڵ و ئەدهەم بارزانی

ئەدهەم بارزانی سیاسەتمەداری کوردستان لەپەیامێکیدا رایگەیاند: بۆ ئەوەی هاوسەنگی هێز تێکنەچێت دەنگ بدەن بەو کاندیدانەی هێژا بافڵ جەلال تاڵەبانی دیاری کردون.

دەشڵێت: هەر وەک هەموومان چاوەڕێین بڕیار وایە لە ڕۆژی 11ـی 11ـی ئەمساڵ هەڵبژاردنی ئەنجومەنی نوێنەرانی عیراق بەڕێوەبچێت، کە پرۆسەیەکی گرنگ و هەستیارە لەبەردەم دۆزی ڕەوای میللەتەکەمان لەناوخۆی هەرێمی کوردستان، کە ئەوەی پێویستەو زۆر گرنگە بۆ ئەم شێوازە دەسەڵاتەی 34 ساڵەی ڕابردوو هاوسەنگی و (تەوازنی) هێز رابگیرێت لە کوردستان و تێکنەچێت، وە گرنگە هاوڵاتیان بە دەنگەکانیان لێ نەگەڕێن لایەنێک باڵادەستی خۆی بەسەر لایەنەکاندا فەرز بکات.

وتیشی: هەر وەک دیارە لە ماوەی چەند ساڵی ڕابردوودا و تاکو ئێستا قەیرانی ئابوری و دارایی و کۆمەڵاییەتی و سیاسی و نەمانی باوەڕ و کەرامەت بەرۆکی هاوڵاتیان و جەماوەری هەرێمی کوردستانی گرتووەو لە دۆخێکی مەترسیداردا دەژین و ئۆپۆزسیۆنیش بە کۆن و نوێوە توانای گۆڕانکاریان لەم سیستەمە چەقبەستووەدا نەبووەو نیە، دەسەڵاتیش بەرەو ڕەهاییەکی تەواو بەنەبوونی چاودێریەکی وردی پەرلەمانی دەچێت کە زۆر مەترسیدارە و ئازادی و دیموکراسی و مافی مرۆڤ لە دەستی دەناڵێنێت.

ئەدهەم بارزانی ئاماژەی بەوەش داوە: لەبەر ئەوە نە تەنها پێویستە، بەڵکو ئەرکێکی نیشتیمانییە کە هاوڵاتیان هاوسەنگی لەم دەسەڵاتدا ئەم جارە بە تەواوەتی بپارێزن و دەرکەوت کە بەغداد و ناو پەرلەمانی عێراق بووە بە چەقی ململانێ سیاسیەکان و ناوەندێکی چارەسەکردنی سەرجەم کێشەکان، بۆیـە ئەم هەڵبژاردنە گرنگی و تایبەتمەندی خۆی هەیەو داوا لە سەرجەم چین و توێژەکان دەکەم بە شێوەیەکی بەرفراوان ڕوو لە ناوەندەکانی دەنگدان بکەن، دەنگ بدەن بەو کاندیدانەی کە هێژا بافڵ جەلال تاڵەبانی سەرۆکی یەکێتی نیشتیمانی کوردستان دیاری کردون، بۆ ئەوەی ئەم هاوسەنگییە پارێزراو بێت و خزمەتێکی زیاتر بە هاوڵاتیانی کوردستان بکرێت.

هەروەها داوا لە کوردانی نەینەوا و کەرکوک و خانەقینیش دەکات کە ساڵانێکی زۆر خۆیان و باوباپیرانیان قوربانی دەستی ستەمی سەرکوتکارانە بوون و ئێستا هەلێکی تر لەبەردەمیانە تاوەکو بتوانن بەپڕکردنی سندوقەکان بەدەنگی کورد برینەکانیان سارێژ ببێت.

PUKMEDIA