لەکەرکوک پەردە لەسەر پەیکەری سەرۆک مام جەلال لادەدرێت

PUKMEDIA

پەردەلادان لەسەر پەیکەری سەرۆک مام جەلال

بڕیارە ئەمڕۆ لەمەراسیمێکی شایستەدا لەکەرکوک، لەپارکێکی دەروازەی شار پەردە لەسەر پەیکەری سەرۆک مام جەلال لابدرێت، لەبارەی کارە هونەرییەکەشییەوە پەیکەرسازەکە ئاماژە بەوەدەکات: ماوەی دروستکردنی پەیکەرەکە 5 مانگی خایاندووە.

پەیکەرساز سامان ئەبوبەکر کە پەیکەرەکەی دروستکردووە بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: بیرۆکەی دروستکردنی پەیکەرەکە لەلایەن سکرتارییەتی سەرۆک مام جەلالەوە بووە لەکەرکوک، هەریەک لە ئاسۆ مامەند لێپرسراوی کەرکوک-سەلاحەدینی یەکێتیی نیشتمانیی کوردستان و رێبوار تەها پارێزگاری کەرکوک و ژمارەیەک لەئەندامانی سەرکردایەتی پاڵپشتی دروستکردنەکەیان کردووە

راشیگەیاند: پەیکەرەکە پێکدێت لە مێچەرێکی ئاسن و بە مەڕ مەڕ رووپۆشکراوە و دریژییەکەی 6 مەترە، هاوکات ماوەی دروستکردنەکەی 5 مانگی خایاندووە و لەسەر بناغەکەی بەشێوەی نەخشی بارز چەندین شوێنی بەناوبانگی کەرکوکی تێدا نەخشێنراوە، لەوانە (منارەی داقوق-قشڵە- قەڵای کەرکوک و کتێبخانەی گشتی) .

ئەمەش لەکاتێکدایە، بڕیارە سەعات 4:00ی ئەمڕۆ لە مەراسیمێکی شایستەدا بەئامادەبوونی ئاسۆ مامەند لێپرسراوی کەرکوک-سەلاحەدینی یەکێتیی نیشتمانیی کوردستان و رێبوار تەها پارێزگاری کەرکوک و ژمارەیەکی زۆر لەکەسایەتی حزبی و حکومی و کەرکوکییەکان لەپارکی سەرۆک مام جەلال کە دەکەوێتە دەروازەی کەرکوک پەردە لەسەر پەیکەرەکە لاببرێت.


PUKMEDIA