شێخ جەعفەر: رەوانەكردنی زۆرترین كاندیدی یەكێتی بۆ پەرلەمان دەستكەوتێكی نەتەوەییە

راگەیاندنی شێخ جەعفەر شێخ مستەفا

شێخ جەعفەر بازنەكانی هەڵبژاردنی دوكان و پیرەمەگرون و بازیان بەسەردەكاتەوە

ئەمڕۆ دووشەممە 3ی تەشرینی دووەمی 2025، شێخ جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان، سەردانی بازنەكانی هەڵبژاردنی كرد لە دوكان، پیرەمەگرون و بازیان و لەلایەن عەبدوڵڵا كانی بەردی لێپرسراوی بازنەی دوكان و پۆڵای شەهید سیروان تاڵەبانی لێپرسراوی بازنەی پیرەمەگرون و ئازادی تەندروستی لێپرسراوی بازنەی بازیان و ستافی هەرسێ بازنەكەوە بەگەرمیی پێشوازیی لێكرا.

لەو دیدارانەدا، كە هەڤاڵ حاكم سوبحی ئامادەی بوو، لێپرسراوی ئەنجومەن، دەستخۆشی لەهەوڵ و ماندووبوونی لێپرسراو و كادیرانی بازنەكانی هەڵبژاردن كرد كە ماندوونەناسانە سەرقاڵی بەجێگەیاندنی ئەركەكانیانن، هاوكات جەختی لەسەر گرنگی بەشداریی بەرفراوانی ژنان كردەوە لە تیمەكانی بانگەشەی هەڵبژاردن، بەوپێیەی ژنان نیوەی كۆمەڵگەن و دەتوانن بەدەنگەكانیان گۆڕانكاریی لەدەرەنجامی هەڵبژاردندا بهێننەئاراوە، بەتایبەتی لەم هەڵبژاردنەی 11/11 دا كە پێشبینی دەكرێت جەماوەری گەلەكەمان بەجۆش و خرۆشەوە رووبكەنە ناوەندەكانی دەنگدان و سندوقەكانی دەنگدان سەوزپۆش بكەن و سەرەنجام ئاهەنگی سەركەوتنی لیستی شەهیدان و نیشتمانپەروەران بگێڕین.

لەبەرانبەردا، لێپرسراوو كادیرانی بازنەكان، سوپاسی رێنمایی و هاندان و دەستخۆشییەكانی لێپرسراوی ئەنجومەنیان كردو دووپاتیان كردەوە كە تەواوی تواناكانیان چڕدەكەنەوە بۆ سەرخستنی لیستی 222ی یەكێتی.

هەر لەو سەردانەدا لێپرسراوی ئەنجومەن، ئامادەی كۆبوونەوەیەكی جەماوەریی عەشیرەتی مەنمی بوو لەگوندی دارتوی حاجی حارس، كە بۆ پشتیوانیكردنی لیستی 222  سازكرابوو و لەلایەن بەڕێزان كوێخا كەمال مەنمی سەرۆكی عەشریتی مەنمی و فەریق غریب-ەوە رێكخرابوو.

لەكۆبوونەكەدا شێخ جەعفەر ستایشی رۆڵی جوامێرانەی عەشیرەتی مەنمی لە شۆڕشەكانی گەلی كوردستاندا كرد، بەتایبەتی لەشۆڕشی نوێی گەلەكەماندا، كە تێیدا دەیان پێشمەرگەی قارەمانیان شەهیدبوون و دەیانی تریش بریندارو كەمئەندامبوون، باسی لەگرنگیی سەركەوتنی لیستی 222 لەم هەڵبژاردنەدا كرد، كە رەوانەكردنی زۆرترین كاندیدی یەكێتی بۆ ئەنجومەنی نوێنەرانی عیراق،
 دەستكەوتی یاسایی و نەتەوەیی گرنگ بۆ خەڵكی كوردستان فەراهەم دەكات.

PUKMEDIA