مامۆستایانی پشدەر پشتیوانی لە لیستی ٢٢٢ی یەکێتی دەکەن

PUKMEDIA

د. میران محەمەد سەرپەرشتیاری بازنەکانی هەڵبژاردنی راپەڕین

مامۆستایانی پشدەر لە کۆبوونەوەیەکی فراواندا، هاوکات لەگەڵ گفتوگۆکردنی ئەرکە گرنگ و چارەنووسسازەکەی ئێستا و قۆناغەکە، کە خۆی لە سەرخستنی لیستی ٢٢٢ی یەکێتیی نیشتمانیی کوردستان بۆ پەرلەمانی عیراق دەبینێتەوە، جەخت لە پێکەوە کارکردن و تەرخانکردنی توانستەکان دەکەنەوە.

شەممە 1ی تشرینی دووەمی2025، د. میران محەمەد ئەندامی ئەنجومەنی سەرکردایەتی و سەرپەرشتیاری بازنەکانی هەڵبژاردنی راپەڕین، بە ئامادەبوونی  سەرپەرشتیارانیی بازنەکانی هەڵبژاردنی یەک و دوو و تیمی یەکێتی لە حکومەتی خۆجێی راپەڕین و بەڕێوەبەری گشتی پەروەردەی ڕاپەڕین و بەڕێوەبەری پەروەردەی پشدەر، لە کۆبوونەوەیەکی فراوانی مامۆستایانی سنووری بەڕێوەبەرایەتییەکە لە قەزای پشدەر، هەڵوەستەی پڕۆگرامی لیستی ٢٢٢ی یەکێتیی سەبارەت بە سیستەمی پەروەردە و خوێندن کرد و وتی: سیستەمی پەروەردە، خوێندنی باڵا و خوێندن وەک كۆڵەكە سەرەكییەکەی بنیاتنانی وڵات دەبینین.

سەرپەرشتیاری بازنەکانی هەڵبژاردنی ڕاپەڕین، ئاماژەی بەوەشکرد: چارەسەری مووچە و بژێوی ژیانی خەڵک و مامۆستایان، بە درێژایی خولەکانی رابردووی پەرلەمانی عیراق ئەولەویەتی یەکێتی بووە و چارەسەرکردنی یەکجارەکی ئەم پرسەش تەنها بە یەکێتی دەکرێت، ڕوونیکردەوە، یەكێتیی نیشتمانیی كوردستان وەك حزبێكی پێشكەوتنخواز و نوێخواز بڕوای بە سیستەمێكی پەروەردەیی مۆدێرن و گەشەپێدانی بەردەوام هەیە بۆ ئایندەیەكی گەش بۆ رۆڵەكانمان، بە ئامانجی بەرزكردنەوەی ئاستی خوێندن و پەروەردە لە هەرێمی كوردستان و سەرانسەری عیراقدا، بە شێوەیەك كە گونجاو بێت لەگەڵ پێداویستییەكانی بازاڕی كار و تەكنەلۆژیای سەردەم.

باسی لەوەشکرد، پشتیوانی کردنی یەکێتی و لیستەکەی لەم قۆناغ و دەرفەتە گرنگەدا، پشتیوانی کردنە لە ژیانێکی باشتر بۆ میللەتەکەمان، بۆ چارەسەری کێشەی مووچە و پەرەپیدانی سیستەمی پەروەردەو خوێندن، پشتیوانی کردنە لە بەهێزکردنەوەی پێگەی کورد و پێگەی هەرێم لە بەغداد و لەسەر ئاستی ناوچەکە.

سەرپەرشتیاری بازنەکانی هەڵبژاردنی ڕاپەڕین راشیگەیاند: ئەوەی تا ئێستا کراوە یەکێتیی کردویەتی و ئەوەی نەشکراوە بە یەکێتیی نەکراوە بۆیە نەکراوە، لەبەر ئەوە هەتا یەکێتی بە هێز تر بکەین، کارە تەواو نەکراوەکان تەواوتر دەکەین و هەنگاوە ستراتیژییەکان باشتر دەکەونە خزمەت خەڵک و میللەتەکەمان. بۆیە داوامان وایە ئەم چەند ڕۆژەی ماوە بە هەموو هێز و توانای خۆتانەوە تەرخانی بکەن بۆ کۆکردنەوەی دەنگ و پستیوانی کردنی لیستی ٢٢٢ یەکێتیی.

PUKMEDIA