لەفێستیڤاڵی هەنارو پایزی هەڵەبجە نزیکەی دوو ملیار فرۆش هەبووە

راگەیاندنی پارێزگای هەڵەبجە

پارێزگاری هەڵەبجە لەگەڵ سەرپەرشتیارانی ڤێستیڤاڵی هەنار

پارێزگاری هەڵەبجە سەرکەوتنی ئەنجامدانی یازدەهەمین فێستیڤاڵی هەنار و پایزی هەڵەبجەی راگەیاند و لەو چوارچێوەیەدا سوپاسی سەرجەم ئەو کەس و لایەنانەی کرد کە هاوکاربوون لەبەدیهاتنی ئەو سەرکەوتنە، لەو چوارچێوەیەشدا رێکخەرانی فێستیڤاڵ رایانگەیاند: لە سێ رۆژی فێستیڤاڵ زیاتر لە یەک ملیار و 700 ملیۆن دینار فرۆشی بەرهەمەکانی فێستیڤاڵ هەبووە.

نوخشە ناسیح پارێزگاری هەڵەبجە رایگەیاند: لەگەڵ کۆتاییهاتنی سێ ڕۆژ لە جوانی و ڕەنگ و میوانداری، خۆشحاڵین کە ڕایبگەیەنین یازدەیەمین فێستیڤاڵی هەنار و پایزی هەڵەبجە، بە سەرکەوتنێکی گەورە و بێوێنە کۆتایی بە کارەکانی هێنا. ئەم سەرکەوتنە، سەرکەوتنی هەموو لایەکمانە و مایەی شانازییە بۆ هەڵەبجە و بۆ هەموو کوردستان.

وتیشی: سوپاسی سەرجەم ئەو کەس و لایەنانە دەکەین کە هاوکاربوون و ماندووبون بۆ ئەم سەرکەوتنەی فێستیڤاڵ بەدەستی هێناو بۆ هەر کەم و کورتییەکیش داوای لێبوردن دەکەین و هەوڵدەدەین لە ساڵانی رابردوو باشتر کارەکان بەرێوەبەرین.

هاوکات رێکخەران و سەرپەرشتیارانی فێستیڤاڵ لە کۆنگرەیەکی رۆژنامەوانیدا رایانگەیاند: یەک ملیار و 700 ملیۆن دینار فرۆش هەبووە هەتا سەعات 5ی ئێوارەی سێیەم رۆژ، هاوکات 81 هەزار ئۆتۆمبێلی بچوک داغڵی پارێزگاکە بووەو720 مینی پاسیش داغڵ بوون، نزیکەی 419 هەزار و 700 سەردانیکار لە فێستیڤاڵ بەشداربوون.

PUKMEDIA