شێخ جەعفەر: سەرکەوتنی یەکێتی پرسی نیشتمانی و نەتەوەیی کورد لە عیراق بەهێز دەکات

نوسینگەی راگەیاندنی شێخ جەعفەر

شێخ جەعفەر

لێپرسراوی ئەنجومەنی  پاراستنی بەرژەوەندییە باڵاکانی یەکێتیی نیشتمانیی کوردستانلە کۆبوونەوەیدا لەگەڵ ژمارەیەکی زۆر لە مافپەروەرانی  سنووری پارێزگای سلێمانی رایگەیاند: سەرکەوتنی یەکێتی لەم هەڵبژاردنە کاریگەری باشی دەبێت لە بەرەوپێشبردنی پرسی نیشتمانی و نەتەوەیی کورد لە سەر ئاستی عیراق.

ئەمڕۆ 30ی 10ی 2025 شێخ جەعفەر شێخ مستەفا، لێپرسراوی ئەنجومەنی  پاراستنی بەرژەوەندییە باڵاکانی یەکێتیی نیشتمانیی کوردستان بەیاوەری تەلار لەتیف، ئەندامی مەکتەبی سیاسیی و لێپرسراوی ناوەندی کاروباری یاسایی یەکێتیی نیشتمانیی کوردستان پێشوازیکرد لە ژمارەیەکی زۆر لە مافپەروەرانی  سنووری پارێزگای سلێمانی لەبارەگای ئەنجومەن و رایگەیاند: ئێوە توێژێکی گرنگ و کاریگەرن و رۆڵێکی گەورەتان هەیە لە کۆمەڵگەدا و لە هەڵبژاردنی پێشوودا جێدەستان دیاربوو لە زیادکردنی دەنگەکانی یەکێتیدا و ئێوە بەرکەوتەی راستەوخۆتان  لەگەڵ هاوڵاتیاندا هەیە، بۆیە بەباشی دەتوانن ئەو راستییەیان بۆ روونبکەنەوە کە سەرکەوتنی یەکێتی لەم هەڵبژاردنەدا چ کاریگەرییەکی باشی دەبێت لەسەر دەرچوواندنی ئەو یاسایانەی کە لە بەرژەوەندی خەڵکی کوردستان دایە، جگە لەوەش فاکتەرێکی بەهێز دەبێت بۆ بەرەوپێشبردنی پرسی نیشتمانی و نەتەوەیی میللەتەکەمان لەسەر ئاستی عیراق.

لە کۆبوونەوەکەدا کە هەریەکە لە جوتیار نوری و شاهۆ عوسمان ئامادەیبوون، لێپرسراوی ئەنجومەن ئاماژەی بەوەشکرد: یەکێتیی هەمیشە لەبەرەی کۆمەڵانی خەڵکدا بووە و رەچەشکێنی هەڵگیرسانەوەی شۆڕش و ئەندازیاری راپەڕین و دامەزرێنەری سەرەکی حکومەتی هەرێمە، هەروەها لەئێستاشدا خوازیارە لەڕێی خەباتی مەدەنیانەی دیموکراسییەوە داکۆکی لە قووت و بەرژەوەندی خەڵک بکات و لە بەغدادەوە شەڕی مافەکانیان بکات. لەو سۆنگەیەشەوە داوای لە ئامادەبووان کرد؛ تەواوی تواناکانیان بخەنەگەڕ بۆ سەرخستنی کاندیدانی دڵسۆزی لیستی 222 و دڵنیایشی دا بە مافپەروەران کە "پشت بەخوا دیداری داهاتوومان لەگەڵ ئێوەی بەڕێزدا دیداری سەرکەوتن و ئاهەنگگێڕان دەبێت، بەبۆنەی سەرکەوتنی لیستی 222ی یەکێتی.

PUKMEDIA