قوباد تاڵەبانی: کێشەی مووچە بە پینەوپەڕۆ چارەسەر ناکرێت

نوسینگەی رۆژنامەوانی قوباد تاڵەبانی

قوباد تاڵەبانی

قوباد تاڵەبانی سەرپەرشتیاری بازنەی هەولێری لیستی 222ی یەکێتیی نیشتمانیی کوردستان بۆ هەڵبژاردنی خولی شەشەمی ئەنجومەنی نوێنەرانی عیراق، رایدەگەیەنێت: بە داخەوەم کە دەڵێم کێشەی مووچە چارەسەر نەکراوە و ئەوەی هەیە تەنها پینەکراوە و لە کۆتایی ئەمساڵیش جارێکی دیکە کێشەکە سەرهەڵدەداتەوە. لە ئێستاوە خەڵکانێک داوا لە کاک بافڵ دەکەن بچێتە بەغدا و چارەسەرێکی بۆ بدۆزێتەوە.

لە کۆبوونەوەی لەگەڵ هاڤاڵانی بازنەی 16ی حەسارۆست لە دۆڵی رۆست باسم قوباد تاڵەبانی ئاماژەی بەوەکرد: هەر ئەوەی کە هەموو جارێک کاک بافڵ و یەکێتی بە ١٨ کورسییەوە دەتوانن بە شێوەیەکی کورتخایەنیش بێت کێشەکە چارەسەر بکەن، ئاماژەیەکی روونە بۆ ئەوەی ئەگەر بێتو یەکێتی بە کورسی و قورساییەکی زیاترەوە لە بەغدا ئامادەبێت، دەتوانێت کاری گەورە بکات.

راشیگەیاند: بەندە پێش دوو ساڵ وتم کێشەکانی هەرێم و بەغدا بە پینەوپەڕۆ چارەسەر ناکرێن، ئێستاش یەکێتی پێیوایە لە جیاتی پینەوپەڕۆ پێویستە کۆی پەیوەندییەکانی هەرێم و بەغدا لە چوارچێوەی نەشتەرگەرییەکی گەورەدا چارەسەر بکرێن. هەربۆیە دەڵێین یەکێتی کار دەکات تا کێشەی مووچە و بودجە و هەموو کێشەکانی دیکە لە چوارچێوەی رێککەوتنێکی گشتگیری درێژخایەن چارەسەر بکات و داوای جێبەجێکردنی مادە بە مادەی دەستور لەلایەن هەردوو حکومەتی فیدراڵ و هەرێمەوە دەکات.

PUKMEDIA