نموونەى خوێنى کەسوکارى ئەنفالکراوان لە چەمچەماڵ وەردەگیرێت

PUKMEDIA

تاوانى شاڵاوى ئەنفال

ئەمڕۆ دووشەممە 27ى10ى2025 بۆ رۆژى دووەم هەڵمەتى نیشتمانى وەرگرتنى نموونەى خوێن و زانیارى لە کەسوکارى ئەنفالکراوان لە قەزاى چەمچەماڵ بەردەوامى هەیە و راوێژکارى سەرۆکایەتى کۆمارى عیراق، رایگەیاند: ئەم نموونەى خوێنانەى ئێستا لە کەسوکارى ئەنفالکراوان وەردەگیرێت، بۆ ئەوەیە دواتر لەگەڵ ئەو نموونە ئێسکیانەى کە پێشتر لە رووفاتەکان وەرگیراون بەراورد بکرێن.

پەرى نورى راوێژکارى سەرۆکایەتى کۆمارى عیراق، رایگەیاند: کەسوکارى قوربانیانى ئەنفال ئامادەباشیان بۆ پێشوازى کردن لە تیمەکە بۆ پێدانى زانیارى و سامپڵى خوێن هەیە، لەبەرئەوەى مەبەستیانە ئەم پڕۆسەیە سەرکەوتوو بێت و سەرجەمیان سوپاس و پێزانینیان بۆ خانمى یەکەمى عیراق هەیە.

روونیشیکردەوە: ساڵى پار 172 روفاتمان بۆ گۆڕستانى ئەنفال لە چەمچەماڵ هێنایەوە و چەندین گۆڕى دیکەمان لە سەماوە  دۆزییەوە و گۆڕێکى بە کۆمەڵیشمان هەڵدایەوە و لە ئێستادا رووفاتەکان هەمووى سامپڵى لێوەرگیراوە و ئەم نموونەى خوێنانەى ئێستاش لە کەسوکارى ئەنفالکراوان وەردەگیرێت، بۆ ئەوەیە دواتر لەگەڵ ئەو نموونە ئێسکیانەى کە پێشتر لە رووفاتەکان وەرگیراون بەراورد بکرێن.

جێى ئاماژەیە، بۆ چوارەمینجارە کە نموونەى خوێنى کەسوکارى ئەنفالکراوان لە چەمچەماڵ وەردەگیرێت و لەسەر ئاستى هەرێمى کوردستانیش هەشتەمینجارە.

PUKMEDIA