مامۆستایانی كەركوك پشتیوانی لە لیستی 222 دەكەن

PUKMEDIA

مەراسیمی رێزلێنان لە ژمارەیەك مامۆستای خۆبەخشی خوێندنی كوردی لە كەركوك

لە مەراسیمێكدا خەڵاتی رێزلێنان بەخشرایە ژمارەیەك مامۆستای خۆبەخشی خوێندنی كوردی لە كەركوك و مامۆستایانی شارەكەش پشتیوانی خۆیان بۆ سیاسەتی یەكێتی لە شارەكە و لیستی 222 ی یەكێتیی نیشتمانیی كوردستان دووپاتكردەوە.

 لە مەراسیمەكەدا كە ئاسۆ مامەند ئەندامی مەكتەبی سیاسی و سەرپەرشتیاری كەركوك سەلاحەدینی یەكێتی ئامادەی بوو رایگەیاند: لە حەوت هەزار پلە وەزیفییەكەی پێشوودا كە دادەمەزرێن ژمارەیەكی زۆر لە مامۆستایانی خۆبەحشی تێدایە و ئەوانەی دیكەش بە هەوڵی پارێزگاری كەركوك هەوڵدەدەین لە بودجەی پتڕۆدۆلاری كەركوك دایانبمەزرێنین تا ئەوكاتەی بەشێوەیەكی رەسمی دادەمەزرێندرێن.

راشیگەیاند: ئەركی حكومەتی خۆجێی كەركوكە كار بۆ دامەزراندنی ئەو مامۆستا خۆبەخشانە بكات، هاوكات وەك یەكێتیش بەڵێن بە سەرجەم توێژەكانی شارەكە دەدەین كە دەرگای دامەزراندنیان بۆ بكەینەوە و هەرچییەك لە تواناماندا هەبێت بۆیان بكەین.

هەر لە مەراسیمەكەدا رێبوار تەها پارێزگاری كەركوك رایگەیاند: وەك چۆن لە رابردوودا بەڵێنمان دابوو لەسەر راسپاردەی سەرۆك بافڵ ئیدارەیەكی نوێ لە كەركوك دروستبكەین و دروستمان كرد، بۆ داهاتووش بەڵێن دەدەین بێ جیاوازی خزمەتی زیاتری سەرجەم توێژەكانی شارەكە بكەین.

بەهەوڵی نوێنەرانی یەكێتی لە بەغداد هەوڵمانداوە پرس و كێشەكانی مامۆستایانی خۆبەخش بگەیەنینە وەزارتی پەروەردە و ئەنجومەنی وەزیرانی عیراق و لە چاوەڕوانی چارەسەركردنی كێشەكانیانداین.

بەپێی زانیارییەكانی PUKMEDIA، پارێزگاری كەركوك جگە لەوەی كە رەزامەندی لەسەر دامەزراندنی ژمارەیەك مامۆستای خۆبەخش لەسەر بودجەی پتڕۆدۆلار دەربڕیوە، هاوكات رەزامەندیشی داوە لەسەر دابەشكردنی زەوی بەسەر مامۆستایان و سوودمەندبوونی ئەو توێژە گرنگەی كەركوك لە زەوی.

PUKMEDIA