یه‌كێتی له‌پێناو خه‌ڵك رێكخستنه‌وه‌ی په‌یوه‌ندییه‌كانی هه‌رێم و عیراقی ده‌وێت

PUKMEDIA

لۆگۆى یەکێتیى نیشتمانیى کوردستان و حکومەتى هەرێم و عیراق

په‌یوه‌ندییه‌كانی نێوان هه‌رێم و به‌غداد، له‌ كارنامه‌ی لیستی 222ی یه‌كێتیی نیشتمانیی كوردستاندا بۆ ئه‌نجومه‌نی نوێنه‌رانی عیراق، بایه‌خ و گرنگی زۆری پێدراوه‌ و پێوایه‌ جێبه‌جێكردنی ته‌واوی مادده‌ ده‌ستورییه‌كان، به‌ تایبه‌ت ئه‌و ماددانه‌ی كه‌ په‌یوه‌ندییان به‌مافه‌كانی هه‌رێمی كوردستانه‌وه‌ هه‌یه‌ خزمه‌ت به‌ هاووڵاتییانی هه‌رێمی كوردستان ده‌كات و باشتركردنی په‌یوه‌ندییه‌كانی نێوان هه‌ردوولا له‌ به‌رژه‌وه‌ندی حكومه‌تی هه‌رێم و حكومه‌تی عیراقیشه‌.

كارنامه‌ی لیستی 222 ی یه‌كێتی بۆ په‌یوه‌ندی نێوان هه‌رێم و به‌غداد

دووباره‌ داڕ‌شتنه‌وه‌ی په‌یوه‌ندییه‌كانی نێوان حكومه‌تی هه‌رێمی كوردستان و حكومه‌تی فیدڕ‌اڵی عیراق یه‌كێكه‌ له‌ كاره‌ پێشینه‌كانی یه‌كێتیی نیشتمانیی كوردستان وه‌ك چۆن له‌ رابردوودا كاری بۆ كردووه‌، تاوه‌كو له‌م په‌یوه‌ندییه‌دا كاریگه‌ری دیدگای تاكڕ‌ه‌وانه‌ی لایه‌نێك و گوتاری هێزه‌ پۆپۆلیست و دروشمباز و موزایه‌ده‌چییه‌كان بێڕ‌ۆڵ بكات و كێشه‌ هه‌ڵپه‌سێردراوه‌كانی نێوان هه‌رێم و به‌غداد به‌شێوه‌یه‌كی ریشه‌یی چاره‌سه‌ر بكات:

1.  كاركردن بۆ جێبه‌جێكردنی ته‌واوی مادده‌ ده‌ستورییه‌كان، به‌ تایبه‌ت ئه‌و ماددانه‌ی كه‌ په‌یوه‌ندییان به‌ مافه‌كانی هه‌رێمی كوردستانه‌وه‌ هه‌یه‌.

2.  به‌رده‌وامبوون له‌ دیالۆگی جددی و بنیاتنه‌ر له‌گه‌ڵ حكومه‌تی فیدرالی بۆ چاره‌سه‌ری كێشه‌ هه‌ڵپه‌سێردراوه‌كان ( كه‌ركوك و ناوچه‌ كوردستانییه‌كانی ده‌ره‌وه‌ی ئیداره‌ی هه‌رێمی كوردستان، پشكی هه‌رێمی كوردستان له‌ بوودجه‌، دۆسیه‌ی هێزه‌كانی پێشمه‌رگه‌).

3.  داكۆكی كردن له‌ پره‌نسیپی هاوبه‌شی راسته‌قینه‌ له‌ بڕ‌یاره‌كانی ده‌وڵه‌ت و دامه‌زراوه‌ فیدڕ‌اڵییه‌كان و بوونی پشكی نوێنه‌رایه‌تی كارا و هاوبه‌شی راسته‌قینه‌ له‌ دامه‌زراوه‌ سیادییه‌كانی ده‌وڵه‌ت وه‌ك: وه‌زاره‌ته‌ خزمه‌تگوزاری و ئه‌منییه‌كان، ده‌زگا فیدراڵییه‌كان، نوێنه‌رایه‌تی دیپلۆماسی عیراق له‌ ده‌ره‌وه‌.

4.  هه‌وڵدان بۆ ده‌ركردنی یاسایه‌كی هاوبه‌شی نه‌وت و گاز كه‌ مافه‌كانی هه‌رێم و عیراق ده‌سته‌به‌ر بكات.

یه‌كێتی به‌په‌یوه‌ندییه‌كی نوێ عیراق و هه‌رێم به‌یه‌كه‌وه‌ ده‌به‌ستێته‌وه‌

هه‌ر قۆناغه‌ و تایبه‌تمه‌ندی خۆی هه‌یه‌، یه‌كێتیی نیشتمانیی كوردستانیش بۆ  ئه‌م قۆناغه‌ دیالۆگ و هه‌نگاوی كرداریانه‌ بۆ به‌هێزكردنی په‌یوه‌ندییه‌كانی نێوان هه‌رێم و عیراق به‌ چاره‌سه‌ر ده‌زانێت و له‌ڕ‌ێگه‌ی سه‌رۆك بافڵه‌وه‌ هه‌نگاوی كرده‌یی بۆناوه‌.

د. نه‌به‌ز مه‌جید، كاندیدی ژماره‌ 22 له‌سه‌ر لیستی 222 ی یه‌كێتی له‌ بازنه‌ی هه‌ولێر، به‌ وێبسایتی ره‌سمیی یه‌كێتیی نیشتمانیی كوردستان   PUKMEDIAی راگه‌یاند: په‌یوه‌ندییه‌كانی نێوان هه‌رێم و به‌غداد په‌یوه‌ندییه‌كی گرنگ و چاره‌نووسسازه‌، چونكه‌ په‌یوه‌ندی به‌ ژیانی تاك به‌ تاكی هاووڵاتییانه‌وه‌ هه‌یه‌ و یه‌كێتی ده‌یه‌وێت به‌ دیدگایه‌كی نوێ و له‌سه‌ر بنه‌مای ده‌ستوور په‌یوه‌ندییه‌كانی هه‌رێم له‌گه‌ڵ به‌غداد دابڕ‌ێژێته‌وه‌ و له ‌رێگه‌ی سه‌رۆكه‌كه‌یه‌وه‌ كاری جددی بۆ ده‌كات، هاوكات په‌یوه‌ندییه‌كی به‌هێزی بۆ جێبه‌جێكردنی ئه‌و هه‌نگاوانه‌ دروست كردووه‌ كه‌ له‌ به‌رژه‌وه‌ندی هه‌رێم و به‌غداد ناویه‌تی.

راشیگه‌یاند: یه‌كێتیی نیشتمانیی كوردستان حزبێكی لۆژیكییه‌ و ده‌زانێت عیراق چی له‌ هه‌رێم ده‌خوازێت و ده‌بێت هه‌رێمیش چی له‌عیراق بخوازێت، هه‌ربۆیه‌ هه‌وڵده‌دات دوور له‌زمانی زبر و هه‌ڕ‌ه‌شه‌، به‌كرداریانه‌ گرێ كوێره‌كانی نێوان هه‌رێم و به‌غداد بكاته‌وه‌ و هه‌ردوولا له‌سه‌ر بنه‌مای په‌یوه‌ندییه‌كی نوێ به‌یه‌كه‌وه‌ ببه‌ستێته‌وه‌، هه‌ربۆیه‌ یه‌كێتی ده‌یه‌وێت رۆڵی له‌داڕ‌شتنه‌وه‌ی ئابوری و په‌یوه‌ندییه‌ نێوده‌وڵه‌تی و ئیدارییه‌كان و راگرتنی باڵانسی نێوده‌وڵه‌تی و پاراستنی ئاشته‌وایی نیشتمانیی و بوژاندنه‌وه‌ی بازاڕ‌ له‌ سه‌رتاسه‌ری عیراقدا هه‌بێت.

یه‌كێتی به‌باشتركردنی په‌یوه‌ندییه‌كان ژیانی خه‌ڵك باشتر ده‌كات

یه‌كێتی به‌پلان و به‌رنامه‌ی تۆكمه‌ كار بۆ باشتركردنی په‌یوه‌ندییه‌كانی هه‌رێم و عیراق ده‌كات، چونكه‌ پێیوایه‌ باشتركردنی په‌یوه‌ندییه‌كان و هه‌مواركردنه‌وه‌ی یاسای نه‌وت و گاز كاریگه‌ری راسته‌وخۆیان له‌سه‌ر باشتركردنی ژیانی خه‌ڵك هه‌یه‌.

بێستون عه‌بدولڕ‌ه‌حمان ناسراو به‌بێستون سابوراوایی، كاندیدی ژماره‌ 14 له‌سه‌ر لیستی 222 ی یه‌كێتی له‌ بازنه‌ی سلێمانی، به‌ وێبسایتی ره‌سمیی یه‌كێتیی نیشتمانیی كوردستان  PUKMEDIA ی راگه‌یاند: یه‌كێتی له‌چوارچێوه‌ی سیاسه‌تی گشتی خۆی و  كارنامه‌كه‌ی بۆ ئه‌نجومه‌نی نوێنه‌رانی عیراقدا كار بۆ باشتركردنی په‌یوه‌ندییه‌كانی هه‌رێم و عیراق ده‌كات له‌پێناو به‌ژه‌وه‌ندی خه‌ڵكی كوردستان و دابینكردنی ژیانێكی شایسته‌تر بۆیان.

راشیگه‌یاند: چه‌ندین ساڵه‌ سه‌رۆكایه‌تی یه‌كێتیی نیشتمانیی كوردستان به‌ پلان و به‌رنامه‌ی تۆكمه‌ سه‌رقاڵی چاره‌سه‌ركردنی كێشه‌كانی نێوان هه‌رێم و عیراقه‌، بۆ داهاتووش ده‌یه‌وێت له‌ ئه‌نجومه‌نی نوێنه‌رانی عیراق له‌ڕ‌ێگه‌ی ئه‌ندامه‌كانییه‌وه‌ كاریگه‌ری زیاتر له‌سه‌ر داڕ‌شتنی سیاسه‌تێكی گونجاو دروستبكات و كار بۆ هه‌مواركردنه‌وه‌ی یاسای نه‌وت و گاز یان ده‌ركردنی یاسایه‌كی هاوبه‌شی نه‌وت و گاز بكات، كه‌ مافه‌كانی هه‌رێم و عیراق ده‌سته‌به‌ر بكات و له‌ خزمه‌تی خه‌ڵكی كوردستاندابێت دوور له‌ به‌رژه‌وه‌ندی تایبه‌ت.


یه‌كێتیی نیشتمانیی كوردستان هه‌ر له‌ سه‌رده‌می سه‌رۆك مام جه‌لال و پاش روخاندنی رژێمی به‌عس له‌ساڵی 2003،  هه‌وڵی پته‌وكردنی په‌یوه‌ندییه‌كانی نێوان هه‌رێم و عیراقی داوه‌، هه‌ربۆیه‌ رۆڵی گرنگ و به‌شداری سه‌ره‌كی بوو له‌نووسینه‌وه‌ و په‌سندكردنی ده‌ستووری نوێی عیراق له‌ساڵی 2005دا و هه‌وڵیدا كورد به‌ شێوه‌یه‌كی یاسایی و فیدراڵی بكرێته‌ هاوبه‌شی سه‌ره‌كی له‌حكومه‌تی عیراق، چونكه‌ یه‌كێتی هه‌میشه‌ به‌غدادی به‌ قوڵایی ستراتیژی چاره‌سه‌ركردنی كێشه‌كان زانیوه‌، له‌ئێستاشدا یه‌كێتی به‌ سه‌رۆكایه‌تی سه‌رۆك بافڵ جه‌لال تاڵه‌بانی هه‌وڵی پته‌وكردن و داڕ‌شتنه‌وه‌ی په‌یوه‌ندییه‌كان ده‌دات له‌به‌رژه‌وه‌ندی خه‌ڵكی هه‌رێم و ئامانجیه‌تی خه‌ڵكی هه‌رێمی كوردستان و عیراق له‌سایه‌تی سیاسه‌تی چه‌پكه‌ گوڵه‌كه‌ی سه‌رۆك مام جه‌لال ژیانێكی باشتریان بۆ ده‌سته‌به‌ر بكرێت.

PUKMEDIA