قوباد تاڵەبانی: سیاسەتی یەکێتی بریتیە لە بودجە و مووچەی گەرەنتیکراو

راگەیاندنی قوباد تاڵەبانی

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان بۆ هەڵبژاردنی خولی شەشی ئەنجومەنی نوێنەرانی عیراق  لە کۆبوونەوەیدا لەگەڵ هەڤاڵانی بازنەکانی 4ی دێگەڵە و ١ی رۆژئاوای کۆیە و 2ی رۆژهەڵاتی کۆیە روونیکردەوە بەرنامە و سیاسەتی یەکێتی بۆ ئەم خولەی ئەنجوومەنی نوێنەرانی عیراق زۆر روونە و لە دوو وشەدایە کە بریتییە لە بودجە و مووچەی گەرەنتیکراو.

قوباد تاڵەبانی لە کۆیەی مام جەلال و شاری ناودارانی کوردەوە، رایگەیاند: بەرنامە و سیاسەتی یەکێتی بۆ ئەم خولەی ئەنجوومەنی نوێنەرانی عیراق زۆر روونە و لە دوو وشەدا بریتییە لە بودجە و مووچەی گەرەنتیکراو، داواکاریی سەرەکیی خەڵکی کوردستانیش رێک هەمان شتە.

راشیگەیاند: خەڵکی کوردستان بێزاربوون هەموو مانگێک لە چاوەڕوانی هات و نەهاتی مووچەدابن، خەڵک خزمەتگوزاری، هەلی کار، بووژانەوەی بازاڕ و شەفافییەتیان دەوێت، هەموو ئەمانەش بەبێ بودجەیەکی گەرەنتیکراو بەدی نایەت.

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان  ئاماژەی بەوەشکرد: گەرەنتیکردنی بودجە و مووچە نە بەو لایەنە دەکرێت کە بەردەوام پەیوەندیی هەرێم و بەغداد تێک دەدات و نە بەو لایەنە بچووکانەش دەکرێت کە کەس حیسابیان بۆ ناکات و بە درێژایی هەموو ئەو ساڵانەی رابردوو هیچ کاریگەرییەکیان نەبووە و تەنها ئامانجیان بووەتە لاوازکردنی پێگەی یەکێتی.

هەر لەچوارچێوەی سەردانەکەیدا بۆ کۆیە لەگەڵ هەڤاڵان و هاوشارییەکانی مام لە هەموو سێکتەرەکان و کۆمیتەکانی زانکۆ و پەیمانگاکان کۆبووەو جەختیکردەوە کە سەرکەوتنی یەکێتی، سەرکەوتنی کوردستانە، سەرکەوتنی یەکێتی هاوتایە بە پاراستنی هەموو دەستکەوتەکان و هەنگاونانە بەرەو سەقامگیریی زیاتر و چارەسەرکردنی کێشەکان بە تایبەتی کێشەی بودجە و مووچە، راشیگەیاند: ئەم یەکێتییەی ئێستا چاوی لە هەوڵ و هیممەتی کۆیە و کۆییەکانە، ماڵ بە ماڵ و کۆڵان بە کۆڵان بگەڕێن و یەکێتییەکەی خۆتان و یەکێتییەکەی مام سەربخەن.

جەختیشیکردەوە، تێدەگەین کۆیە بە ئانقەست لەلایەن حیزبی خاوەن دەسەڵاتی هەولێرەوە پەراوێز خراوە، بەڵام تەنها یەکێتییەکی بەهێز دەتوانێت کۆتایی بەم پەراوێزخستنە بهێنێت و کۆتاییشی پێ دەهێنین.

PUKMEDIA