ئاسۆ مامەند: بەناردنی زۆرترین کاندید پێگەی کورد بەهێزتر دەبێت

دەزگای میدیایی کەرکوک

ئاسۆ مامەند لێپرسراوی کەرکوک – سەڵاحەدینی یەکێتیی نیشتمانیی کوردستان

کەرنەڤاڵی ناساندنی کاندیدەکانی لیستی 222ی یەکێتیی نیشتمانیی کوردستان لە بازنەی کەرکوک - سەڵاحەدین بەئامادەبوونی سەرجەم کاندیدەکانی بازنەی کەرکوک دەستیپێکرد و ئاسۆ مامەندیش دووپاتی دەکاتەوە: بە ناردنی زۆرترین نوێنەر بۆ بەغداد پێگەی کورد بەهێزتر دەکەین.

کەرنەڤاڵەکە بەئامادەبوونی ژمارەیەکی زۆر لە ئەندام و لایەنگرانی یەکێتی بەڕێوەچوو تێیدا ئاسۆ مامەند لێپرسراوی کەرکوک – سەڵاحەدینی یەکێتیی نیشتمانیی کوردستان رایگەیاند: یەکێتی لەسەر ئاستی هەرێم و عیراق خاوەن پێگەیەکی بەهێزە، بەڵام بەهێزتر دەبین ئەگەر نوێنەری زۆرتر بنێرینە بەغداد، بۆ ئەوەی بتوانین شەڕی ناوچە جێناکۆکەکان و هەرێمی کوردستان بکەین.

راشیگەیاند: وەک کەرکوک زۆر هەنگاومان لە پێش ماوە، بۆ ئەوەی حکومەتی خۆجێی کەرکوک بەهێزتر بکەین و خزمەتی زیاتر بکەن،ئەوا پێویستە نوێنەری زیاتر بنێرینە بەغداد و پێکەوە شەڕی خزمەتگوزاری و باشترکردنی ژیانی خەڵکی بکەن.

ئاسۆ مامەند داواشی لە کەرکوکییەکان کرد رۆژی دەنگدان بگەڕێنەوە کەرکوک و دەنگ بە لیستی 222ی یەکێتی بدەن و خەڵکی کەرکوک سەربەرزتر بکەن.

هەر لە کەرنەڤاڵەکەدا، رێبوار تەها سەرۆکی لیستی یەکێتیی نیشتمانیی کوردستان وتەیەکی پێشکەشکرد و رایگەیاند: دەمانەوێت دەنگی بەهێزی کەرکوکییەکان بین لە بەغداد و لە هۆڵی پەرلەمان دەنگ و سەنگی خۆمان هەبێت و کەرکوک و کەرکوکییەکان و خانەقینیەکان و ناوچەکانی دیکە پێویستیان بەو هێزە هەیە لە بەغداد.

 ئاماژەی بەوەشکرد: لە ئەنجومەنی نوێنەرانی عیراق زۆر کارمان بۆ تەواو دەکرێت و زۆر پرسی چارەنوسسازیش هەر لە پەرلەمانەوە دەکرێت، بۆیە ئەنجومەنی نوێنەران زۆر گرنگە.

 سەرۆکی لیستی یەکێتی  راشیگەیاند: بەداخەوە هێشتا بەئێوە دەوترێت ئاوارەکانی کەرکوک، نامانەوێت چیتر بەئێوە بوترێت ئاوارە، دەمانەوێت بێنەوە ناو خوشک و براکانی خۆتان لە شارەکەی خۆتان.

PUKMEDIA