قوباد تاڵەبانی: یەکێتی حزبی بڕیارو هێزی یەکلاکەرەوەیە لە بەغداد

نوسینگەی راگەیاندنی قوباد تاڵەبانی

قوباد تاڵەبانی

سەرپەرشتیاری بازنەی هەولێری لیستی 222ی یەکێتیی نیشتمانیی کوردستان بۆ هەڵبژاردنی خولی شەشەمی ئەنجومەنی نوێنەرانی عیراق رایگەیاند: یەکێتی حزبی بڕیار و هێزی یەکلاکەرەوە یە لە بەغداد و هیچ کاتێک وەک سەرچاوەی کیشە سەیرنەکراوە.

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان لە کۆبوونەوەیدا لەگەڵ هەڤاڵانی بازنەکانی ٨ی نەورۆز و ١٧ی شادی لە هەولێر رایگەیاند: یەکێتی دەتوانێت نوێنەری متمانەپێکراوی خەڵکی کوردستان بێت کە لە بەغدا توانا و هێزی پێویستی هەبێت بۆ چارەسەکردنی کێشەکانیان و هاوکات ئەوەندەش جێی متمانەی هاوبەشە عێراقی و نێودەوڵەتییەکانیش بێت کە بتوانێت بەشدارییەکی کارای هەبێت لە چارەسەرکردنی تەواوی کێشەکان و یەکێتی حزبی بڕیار و هێزی یەکلاکەرەوەیە لە هەموو عێراق.

ئاماژەی بەوەشدا: چ لایەنە عێراقییەکان و چ لایەنە نێودەوڵەتییەکان، یەکێتییەکی بەهێز لە بە‌غدا وەک دەرفەت دەبینن، چونکە یەکێتی تاکە هێزە لەسەر ئاستی عێراق کە هەرگیز وەک سەرچاوەی کێشە سەیر نەکراوە، بەڵکو بە پێچەوانەوە وەک ئەو هێزە سەیر دەکرێت لە قورسترین ساتەوەختەکاندا گرێکوێرەی ئاڵۆزییەکان دەکاتەوە و چارەسەری واقیعبینانە دەخاتەڕوو.


PUKMEDIA