رێبوار تەها بۆ کەرکوکییەکان: لیستی یەکێتی بکەنە بەهێزترین لیست لەسەر ئاستی عیراق

PUKMEDIA

رێبوار تەها سەرۆکی لیستی یەکێتیی نیشتمانیی کوردستان لە کەرکوک

ئەمڕۆ 8ی10ی2025،کەرنەڤاڵی سەرخستنی لیستی 222ی یەکێتیی نیشتمانیی کوردستان لە کەرکوک بەرێوەچوو، رێبوار تەها سەرۆکی لیستەکەش دووپاتی کردەوە:" یەکێتی و کەرکوکییەکان دوانەیەکی لەیەکدانەبڕاون" داواشی کرد لە رۆژی دەنگدان هەمووان لیستی یەکێتی بکەنە بەهێزترین لیستی لەسەر ئاستی کوردستان و عیراق.

رێبوار تەها سەرۆکی لیستی یەکێتیی نیشتمانیی کوردستان لە کەرکوک لەو کەرنەڤاڵە وتەیەکی پێشکەش کرد و رایگەیاند: یەکێتیی نیشتمانیی کوردستان پێشتر هەر بەڵێنێکی دابێت جێبەجێی کردووە، گرنگترین بەڵێن ئاسایی کردنەوەی دۆخی کەرکوک بوو،کە ئەمڕۆ ئیدارەیەکی باش بەهاوبەشێکی راستەقینە لەگەڵ پێکهاتەکانی دیکە لە کەرکوک پێکهێنراوە، کە بووەتە هۆی خزمەتکردنی کۆمەڵانی خەڵک.

سەرۆکی لیستی یەکێتی لە کەرکوک پەیوەست بە دۆخی ئێستای کەرکوک و بەراوردکردنی بە ڕابردوو رایگەیاند: جاران دەهاتین و دەمانوت داوا دەکەین و هەوڵدەدەین،بەڵام ئێستا دەڵێین فەرمانمان کرد و پرۆژەکان جێبەجێ دەکەین، لەم کاتەشدا یادی شەهیدەکانمان دەکەینەوە وهەرگیز لە یادیان ناکەین و بەوەفادەبین بەرامبەر بە خوێنیان و رۆڵەکانیان.

رێبوار تەها لە وتەکەیدا داوای لە کەرکوکییەکان کرد بۆ مانەوەی ئەم ئیدارەیە دەنگ بە لیستی 222ی یەکێتی بدەن و ئاماژەی بەوەکرد: ماوەی ساڵێکە خەڵک داوامان لێدەکات و ئێمە بەدەنگی منداڵێکەوە بە دەنگی هەمووانەوە دەچین، منیش ئێستا داوایەکتان لێدەکەم، کە بۆ خۆم نییە و بۆ تەواوی خەڵکی کەرکوکە، لە پێناو مانەوەی ئەم ئیدارەییە کە خزمەتی خەڵک دەکات، داوا دەکەم 11ی11 بەشدارییەکی کارا بکەن و لیستەکەی یەکێتیی نیشتمانیی کوردستان لەسەر ئاستی کەرکوک و عیراق بکەنە بەهێزترین لیست.

وتیشی: بۆ ئەوەی ئەو بەرنامەیەی دامانناوە تەواوی بکەین، ئێمە رەسمی سیاسەتی یەکێتی لە ئیدارەی کەرکوک جێبەجێی دەکەین، کە پرۆژەی رێبوار تەها نییە، بەڵکو پرۆژەی یەکێتیی نیشتمانیی کوردستانە، دڵنیاشم كه‌ركوكییه‌كان پشتم ده‌گرن بۆ ئه‌وه‌ی خزمه‌تی زیاتریان بكه‌م.

لە کۆتایشدا، رێبوار تەها سەرۆکی لیستی یەکێتیی نیشتمانیی کوردستان لە کەرکوک دووپاتی کردەوە کە کەرکوکییەکان و یەکێتی دوانەیەکی لەیەکدانەبڕاون و 11ی 11 هەموان دەچینە سەر سندوقی دەنگدان و لیستی یەکێتی دەبێتە بەهێزترین لیست.

PUKMEDIA