قوباد تاڵەبانی: سیاسەت و بەرنامەی یەکێتی زۆر روونە

نوسینگەی راگەیاندنی قوباد تاڵەبانی

قوباد تاڵەبانی

قوباد تاڵەبانی لێپرسراوی مەکتەبی سکرتارییەتی سەرۆک مام جەلال و ئەندامی مەکتەبی سیاسیی یەکێتیی نیشتمانیی کوردستان لە هەولێر لەگەڵ هەڤاڵانی سێکتەری یاسایی و مافپەروەرانی یەکێتی کۆبووە و دووپاتیشی کردەوە :" سیاسەتی یەکێتی روونە وهەمیشە پێیوابووە پاراستنی هەرێمی کوردستان و دابینکردنی ماف و شایستەکانی خەڵکی کوردستان تەنها لە رێگەی جێبەجێکردنی دەستوورەوە دەکرێت".

قوباد تاڵەبانی لە کۆبوونەوەکەدا رایگەیاند: سیاسەت و بەرنامەی یەکێتی زۆر روون و شەفافە، لە هیچ مافێکی دەستووری خەڵکی کوردستان خۆش نابین و داوای هیچ شتێکی زیادە و نادەستووریش ناکەین.
وتیشی:" وەک سەرۆک بافڵ وتی شەڕی جێبەجێکردنی ماددە بە ماددە و خاڵ بە خاڵی دەستوور وەک خۆی دەکەین".

هەر لە کۆبوونەوەکەدا قوباد تاڵەبانی دووپاتی کردەوە یەکێتی هەمیشە پێیوابووە و ئێستاش پێیوایە پاراستنی هەرێمی کوردستان و دابینکردنی ماف و شایستەکانی خەڵکی کوردستان تەنها لە رێگەی جێبەجێکردنی دەستوورەوە دەکرێت، نەک بە درووشم و قووڵکردنەوەی ناکۆکییەکان.

PUKMEDIA