نەشئەت شاهوێزی: بەمنزیكانە پلەبەرزكردنەوەو دامەزراندن لە كەركوك رادەگەیەندرێت

PUKMEDIA

نەشئەت شاهوێزی، ئەندامی ئەنجومەنی پارێزگای كەركوك

كۆبوونەوەی ئەنجومەنی پارێزگای كەركوك بەڕێوەچوو، ئەندامێكی ئەنجومەنەكەش رایدەگەیەنێت: دامەزراندن گرنگترین پرسە لە كەركوك و رێككەوتنی تەواوی بۆكراوە و بەزووترین كات پلەبەرزكردنەوە و دامەزراندن رادەگەیەندرێت، راشیگەیاند: دەبێت هەموو بڕیارێك لەبارەی كەركوكەوە لە ئەنجومەنەوە دەربچێت.

نەشئەت شاهوێزی، ئەندامی ئەنجومەنی پارێزگای كەركوك لە فراکسیۆنی یەکێتی لە كۆنگرەیەكی رۆژنامەوانیدا رایگەیاند: پێویستە ئەنجومەنی پارێزگای كەركوك، ئاگاداری سەرجەم كار و چالاكییەكانی ناو شاری كەركوك بێت و هەموو بڕیارێك لەبارەی پارێزگاكەوە لە ئەنجومەنەوە دەربچێت.

راشیگەیاند: لە كۆبوونەوەكەی ئەمڕۆدا، پرسی موختاری گەڕەكەكان و هەماهەنگی فەرماندەیی پۆلسی كەركوك و ئەنجومەنی پارێزگا و چەند پرسێكی دیكە تاوتوێكران.

ئەندامەكەی ئەنجومەنی پارێزگای كەركوك، لەبارەی دامەزراندنیشەوە رایگەیاند: لە ئێستادا گرنگترین پرس لە كەركوك پرسی دامەزراندنە، هەربۆیە  لە كۆبوونەوەكەی ئەمڕۆی ئەنجومەنی پارێزگادا، رێبوار تەها پارێزگاری كەركوك  و سەرۆكی ئەنجومەن ئاماژەیان بەوەكرد، رێككەوتنی تەواویان لەبارەی دامەزراندن و پلەی وەزیفی فەرمانبەرانەوە كردووە و بەزووترین كات و پێش هەڵبژاردن رادەگەیەندرێت.

ئەمڕۆ 30ی 9ی 2025، ئەنجومەنی پارێزگای كەركوك كۆبوونەوەی ژمارە 12 ی خۆی ئەنجامدا و تاوتوێی پرسی نەخشەی وەبەرهێنان لە كەركوك و چۆنییەتی مۆڵەتپێدانی وەبەرهێنان و چەند پرسێكی دیكەی كرد.

PUKMEDIA

كۆبوونەوەی ئەنجومەنی پارێزگای كەركوك: