دەرباز کۆسرەت رەسوڵ: رێباز فاوندەیشن لەخزمەتەکانی بۆ کەرتی پەروەردە بەردەوامە

PUKMEDIA

دەرباز کۆسرەت رەسوڵ

دامەزراوەی رێباز فاوندەیشن بینای خوێندنگایەکی تەواونەکراوی لەشاری هەولێر تەواوکرد و لەبارەیەوە دەرباز کۆسرەت رەسوڵ رایگەیاند: "ئێمە لە خزمەتەکانمان بەردەوام دەبین لە سەرتاسەری کوردستان".

لەکارە خێرخوازییەکانی خۆمان بەردەوام دەبین

دەرباز کۆسرەت رەسوڵ لەکۆنگرەیەکی رۆژنامەوانیدا رایگەیاند: " ئێمە وەک رێباز فاوندەیشن ئەو شانازیەمان پێبەخشرا خزمەتی ئەم شارە بکەین، هەستاین بە تەواوکردنی بینای خوێندنگایەک لە شاری هەولێر کە ئەم پرۆژەیەش لە ساڵی 2014 ەوە بەهۆی قەیرانی داراییەوە نەتوانرا تەواو بکرێت، ئێمە تەواومان کرد، سوپاسی هەموو ئەو کەس و لایەنانە دەکەین هاوکارمان بون و لەکارە خێرخوازییەکانی خۆمان بەردەوام دەبین".

ئەوەشی راگەیاند: "وەک دامەزراوەی رێباز فاوندەیشن لە سەرتاسەری کوردستان خزمەت دەکەین بەتایبەت لە بواری تەندروستی و پەروەردە و لەشارە جیاجیاکان پرۆژەی زۆرمان ئەنجامداوە".

بینای زیاتر بۆ ناوەندەی خوێندن پێویستە

هەر لەو بارەیەوە ئالان حەمەسەعید وەزیری پەروەردەی حکومەتی هەرێم رایگەیاند: "لە کابینەی ٩ی حکومەتی هەرێم هەتا ئێستا 242 خوێندنگا دروستکراوەو 30 خویندنگای تر لەژێر کارکردندان، کە بەکۆی گشتی 4441 ژوری خوێندن لەم کابینەیەدا دروست کراوە کە شوێن بۆ 110 هەزار خوێندکاری نوێ ئامادە کراوە، هاوکات هەزار قوتابخانەش نۆژەنکراوەتەوەو لەگەڵ ئەوەشدا هێشتا بەشێک لە خوێندنگاکان دوو دەوامی و سێ دەوامین و پێویستمان بە بینای زیاترە".

یەکێتی داوای شەراکەتی راستەقینە دەکات

دواتر لە وەڵامی پرسیاری پەیامنێراندا دەرباز کۆسرەت رەسوڵ ئەندامی مەکتەبی سیاسی یەکێتی لەبارەی کاراکردنەوەی پەرلەمان و پێکهێنانی حکومەتی نوێ وتی: "وەک یەکێتی سورین لەسەر ئەوەی بەزوترین کات کابینەی 10 پێکبهێنرێت و لەگەڵ پارتی دور نین لەیەکەوە تەنها چەن رایەکی جیاواز هەیە، بەڵام پێویستە یەک ریز و یەک دەنگ بین بۆ ئەوەی لەبەغدا مافە دەستورییەکانمان بەدەست بهێنین، یەکێتی بۆ ئەم قۆناغە داوای شەراکەتێکی راستەقینە دەکات".

PUKMEDIA