زانكۆی سلێمانی پێنجەمین فێستیڤاڵی فیلمی نێودەوڵەتی سلێمانی لە ئامێز دەگرێت

راگەیاندنى زانكۆی سلێمانی

وێنەیەکى پ.ی.د.دڵشاد مستەفا لە کاتى کۆنگرەى رۆژنامەوانییەکەدا

بەهاوبەشی زانكۆی سلێمانی، پێنجەمین فێستیڤاڵی فیلمی نێودەوڵەتی سلێمانی، بە دروشمی (كەلتووری كوردی و زمانی دایك) لە زانكۆی سلێمانی رێكدەخرێت.

نزیكەی (1500) فیلم لە (30) وڵاتی جیاوازەوە پێشكەشی فێستیڤاڵ كراوە، لەو ژمارەیەش (150) فیلم پەسەندكراوە و لە فێستیڤاڵەكەدا نمایش دەكرێت، (95) فیلم دەچنە پێشبڕكێی فێستیڤاڵەكەوە، بۆ بەدەستهێنانی خەڵاتەكانی فێستڤاڵەكە، كە كۆی گشتی (19) خەڵاتی جیاوازە، بەپێی چوار بەشی جیاواز، كە بریتین لە كورتە فیلم و دۆكۆمێنتاری (ناوخۆیی و دەرەكی)، فیلمی درێژی ناوخۆیی و فیلمی لاوان.

لە كۆنگرەیەكی رۆژنامەوانیدا، كە لە هۆڵی كۆنگرێس لە سەرۆكایەتی زانكۆی سلێمانی بەڕێوەچوو، رێكخەرانی فێستیڤاڵەكە رۆشناییان خستەسەر ئەو چالاكییە ئەكادیمی و هونەرییانەی لە فێستیڤاڵەكەدا پێشكەشدەكرێن.

(پ.ی.د.دڵشاد مستەفا) بەرپرسی بەشی ئەكادیمیی فێستیڤاڵەكە و سەرۆكی لیژنەی دادوەرانی فیلمی ناوخۆیی، رایگەیاند: پێنجەمین خولی فێستیڤاڵی فیلمی نێودەڵەتی جگە لە چالاكییە هونەرییەكان، كۆمەڵێك چالاكی ئەكادیمیش پێشكەشدەكات، كە خۆی لە پێنج پانێڵی جیاواز دەبینێتەوە، هەروەها كەسانی ئەكادیمی لە وڵاتانی دەوروبەر بانگهێشتكراون.

وتیشی: جیاوازی فێستیڤاڵی ئەمساڵ ئەوەیە بە پشتیوانییەكی دارایی زۆر كەم و بە هەوڵی لێبڕاوانەی بەڕێوەبەرانی فێستڤاڵەكە و زانكۆی سلێمانی و دڵسۆزانی شاری سلێمانی ئەنجامدەدرێت، كە بە ماندووبون و لە خۆبردویی و خۆبەخشی كاریان كردووە لەپێناوی هێشتنەوەی دروشمی سلێمانی پایتەختی رۆشنبیرییە.

چالاكییەكانی رۆژی یەكەمی فێستیڤاڵ سەعات پێنجی ئێوارە لە هۆڵی كۆنگرێسی زانكۆی سلێمانی دەستپێدەکات و پانێڵەكانیش بەیانیان لە هۆڵەكانی كۆنگرێس بەڕێوەدەچن، پاشنیوەڕوانیش بۆ ماوەی پێنج رۆژ فیلمەكان لە سیتی سینەما نمایشدەكرێت.

هاوكات، (فوئاد جەلال) بەڕێوەبەری فێستیڤاڵ رایگەیاند: (250) میوان لە وڵاتانی دەرەوە و ناوچەکە و وڵاتانی عەرەبی و چەند ئەكتەرێكی دیاری وڵاتانی عەرەبی بەشدار دەبن و چەندین كتێب و گۆڤار لە چاپدایە لە ئیڤێنتەكاندا دابەشدەكرێن.

ئاشكراشیكرد، كە پڕۆژەی ساڵی داهاتوویان فێستیڤاڵی فیلمی دۆكۆمێنتارییە لە شاری هەڵەبجە ئەنجامدەدرێت.

PUKMEDIA