ئەو کچە کوردەی وەزیری دەرەوە و سەرۆکی سوریای ترساند

deutschland.de

دوزين تيكال

لەپەراوێزی کۆبوونەوەی لوتکەی نەتەوە یەکگرتووەکان کچە رۆژنامەنوسێکی کورد دەردەکەوێت کە دەچێتە لای ئەحمەد شەرع و پرسیاری کەمینەکانی سوریای لێدەکات و ئەو گرتە ڤیدیۆیەش بووەتە جێی سەرنجی تەواوی میدیا جیهانی و عەرەبییەکان بەتایبەت.

دوزەن تەککال ناوی ئەو رۆژنامەنوسە کچەیە و لەدایکبووی ساڵی 1978 دیاربەکری باکوری کوردستانە و کوردی ئێزدییە، ئەو لەتەمەنێکی کەمی منداڵیدا لەگەڵ خانەوادەکەی روودەکاتە تاراوگە و لەوڵاتی ئەڵمانیا دەگیرسێنەوە، ساڵی 2007 زانکۆی لایبێنتس لە هانۆڤەر تەواودەکات و دواتر ماجستێر لە زانستە سیاسییەکان بەدەستدەهێنێت و نامەی ماستەرەکەی لەبارەی کوردانی ئێزدی لە بارودۆخە سیاسییەکاندا دەنوسێت.

ئەو کچە کوردە رۆژنامەنوسێکی لێهاتووە و ساڵی 2018 لەلایەن دامەزراوەی ( بزووتنەوەی ئەوروپا- ئەڵمانیا ) نازناوی خانمی فەخری ئەوروپای پێبەخشی ئەمیش بەهۆی ئەو کارە رۆژنامەوانیانەی لەبارەی قوربانیانی ئیزدیی و کەمینەکانەوە کردبووی.

دوزەن ئێستا بووەتە سەردێڕی تەواوی رۆژنامەکان ئەمیش بەهۆی ئەوەی لە پەراوێزی کۆبوونەوە و وتارەکانی نەتەوە یەکگرتووەکان دەچێتە لای ئەحمەد شەرعی، سەرۆکی ئێستای سوریا و پێی دەڵێت دەمەوێت چەند پرسیارێکت لێبکەم، بەڵام راستەوخۆ لەو کاتەدا ئەسعەد شەیبانی، وەزیری دەرەوەی سوریا بەپەلە خۆی دەگەیەنێتە لای و بە چاو ئیشارەت بۆ سەرۆکی سوریا دەکات کە قسەی بۆ نەکات، ئیتر پاسەوانەکانی دووری دەخەنەوە و پێی دەڵین دواتر.

دوزەن تەککال لە پەڕەی تایبەتی خۆی لە تۆڕی کۆمەڵایەتی (X) نوسیویەتی: بۆ من ئاسان نەبوو کە بچمە بەردەم ئەحمەد شەرع چونکە ئەو پیشتر سەرۆکایەتی بەرەی نوسرە و ئازادکردنی شامی کردووە و بووەتە هۆی مردنی کوردە ئێزدییەکان لە عیراق، چومە بەردەمی و ویستم پرسیار لەبارەی کەمینەکانی سوریاوە بکەم، بەڵام هیچ وەڵامێکم دەستنەکەوت.

لەکاردانەوەی ڤیدیۆکە بەشێکی لە هاوڵاتییانی کوردیش لە تۆڕە کۆمەڵایەتییەکان نوسیویانە چواردەورەکەی سەرۆکی سوریا شارەزان لەوەی کە کچانی کورد ئازا و بوێرن، بۆیە رێگریان لە سەرۆکەکەیان کرد قسە بکات بۆ ئەوەی نەکەوێتە دۆخێکی ئیحراجکەرەوە.

PUKMEDIA