كاركردن لە پرۆژەی دووسایدی رێگەی نێوان چوارقوڕنە- دوكان دەستیپێكرد

کوردستانی نوێ

پرۆژەی دووسایدی رێگەی نێوان چوارقوڕنە- دوكان

بە بڕی 243 ملیار دینار و لەسەر بودجەی وەبەرهێنان، پرۆژەی دووسایدی رێگەی نێوان چوارقوڕنە- دوكان كەوتووەتە بواری جێبەجێكردنەوە و كاركردن لە قۆناغەكانی دووەم و سێیەمی پرۆژەكە دەستیپێكرد.

رێبین محەمەد بەڕێوەبەری رێگەوبانی سلێمانی رایگەیاند: ئێستا كاركردن لە قۆناغەكانی دووەم و سێیەمی پرۆژەكە بەشێكی بە دیزاینی نوێ و بەشەكەی دیكەی بە پێداچوونەوە بەدیزاینە كۆنەكەدا، دەستیپێكردووە.

راشیگەیاند: بەشێكی زۆر گرنگیی پرۆژەكە بە درێژایی 10 كیلۆمەتر لە دوكانەوە تا خەلەكان، دیزاینی نوێی بۆ دەكرێت، ئێستا كاركردن لە پرۆژەكە بەردەوامە و ئامێرەكان سەرقاڵی هاڕینی بەرد و تێكەڵەڕێژكردنی رێگەكەن.

رێبین محەمەد بەڕێوەبەری رێگەوبانی سلێمانی ئاماژەی بەوەشدا: پرۆژەكە لە ماوەی 1000 رۆژدا، بە بڕی 243 ملیار دینار و لەسەر بودجەی وەبەرهێنان و لەلایەن كۆمپانیای گەردین كە كۆمپانیایەكی نێوخۆییە، جێبەجێدەكرێت و بڕیارە بە چڕی كار لە پرۆژەكەدا بكرێت و لە وادەی دیاریكراوی خۆیدا بخرێتە خزمەت هاووڵاتیانەوە.

PUKMEDIA/ کوردستانی نوێ