ترەمپ: سوێند دەخۆم دژی روسیا دەوەستمەوە

AL_Monitor

دۆناڵد ترەمپ سەرۆکی ئەمریکا

سەرۆکی ئەمەریکا لەبەردەم رۆژنامەنوساندا بەڵێنی دا و سوێندی خوارد کە بەرگری لە پۆڵەندا و وڵاتانی باڵتیک بکات ئەگەر روسیا بەردەوام بێت لە پەرەسەندنی گرژییەکان و بەزاندی سنوری ئەو وڵاتانە لە ناوچەکە.

ئەمڕۆ یەکشەممە 21ی9ی2025، دۆناڵد ترەمپ سەرۆکی ئەمەریکا، لە وەڵامی پرسیارێکی رۆژنامەنوساندا کە ئایا روسیا بەردەوامبێت لە بەزاندنی سنوری وڵاتانی باڵتیک، لەئەگەری پەرەسەندنی زیاتری گرژییەکان لە ناوچەکە، دژی روسیا دەوەستێتەوە؟ سەرۆکی ئەمەریکا لە وەڵامدا وتی:" بەڵێ سوێند دەخۆم دەیکەم و ئەو هەوڵەی مۆسکۆمان  پێخۆش نییە".

ئەم لێدوانەی ترەمپ دوای پێشێلکارییەکانی ئەم دواییەی روسیا دێت بۆ سەر ئاسمانی وڵاتانی باڵتیک، کە رۆژی هەینی سێ فڕۆکەی جەنگی میگ-31ـی روسی بەبێ مۆڵەت چوونە ناو ئاسمانی ئیستۆنیا و ئەو وڵاتەش ئیدانەی ئەو هەوڵەی روسیای کرد. 

لای خۆشیەوە دۆناڵد توسک سەرۆکوەزیرانی پۆڵەندا رایگەیاندبوو، لەماوەی  رابردوودا 19 فڕۆکەی بێفڕۆکەوانی روسی چوونەتە ناو ئاسمانی پۆڵەندا و هەر ئەوکات روسیا رایگەیاند ئەوکارەیان بە مەبەست نەبووە.

وڵاتانی باڵتیک هەریەکە لە ئیستۆنیا، لاتیڤیا و لیتوانیان، کە بە درێژایی زیاتر لە 1600 کیلۆمەتر سنووریان لەگەڵ رووسیادا هەیە ئەندامی ناتۆن و ناکۆکن لەگەڵ مۆسکۆدا.

PUKMEDIA