وەزیری ناوخۆی عیراق: کەرکوک تەواو سەقامگیرە و ئاستی تاوان تیایدا دابەزیوە

راگەیاندنی پارێزگاری کەرکوک

وەزیری ناوخۆی عیراق و پارێزگاری کەرکوک

عەبدولئەمیر شمەری وەزیری ناوخۆی عیراق رایدەگەیەنێت ، پارێزگاری کەرکوک سەقامگیرییەکی تەواوی هەیە و ئاستی تاوان  تیایدا دابەزیوە، دووپاتیشی دەکاتەوە:" لە هەموو جومگەکان کاری باش کراوە".

ئەمڕۆ 21ی9ی2025، عەبدولئەمیر شمەری وەزیری ناوخۆی عیراق سەردانی کەرکوکی کرد و لەلایەن ڕێبوار تەها پارێزگاری کەرکوک و سەرۆکی لیژنەی باڵای ئەمنی و محەمەد ئیبراهیم حافز سەرۆکی ئەنجومەنی پارێزگا و جێگرانی کارگێڕی و تەکنیکی پارێزگار و یاریدەدەران و ڕاوێژکاران پێشوازی لێکرا.

پاشان لە کۆنگرەیەکی رۆژنامەوانی هاوبەشدا لەگەڵ رێبوار تەها پارێزگاری کەرکوک، وەزیری ناوخۆی عیراق  رایگەیاند: کەرکوک سەقامگیرییەکی باشی تێدایە و ئاستی تاوان کەمیکردووە، هەروەها کردەوەی تیرۆرستی تیایدا دابەزیوە، هەموو رێکارەکان بە باشی بەڕێوەدەچن و لە ئاستێکی باڵادایە و هیچ تاوانێک نیە کە ئاشکرا نەکرابێت.

دەربارەی هەماهەنگی نێوان حکومەتی خۆجێی کەرکوک و حکومەتی فیدڕاڵی، عەبدولئەمیر شمەری رایگەیاند: هەماهەنگی باش لە نێوان پارێزگاری کەرکوک و حکومەتی فیدڕاڵی هەیە.
دەربارەی بەرێوەچوونی کارەکان لە کەرکوک بەتایبەت لە وەزارەتی ناوخۆ، عەبدولئەمیر شمەری وەزیری ناوخۆی عیراق  دووپاتی کردەوە " لە هەموو جومگەکانی پارێزگاکەدا کاری باش دەکرێت".

PUKMEDIA