کۆمسیۆن زیاتر لە 23 ملیۆن کارتی دەنگدان چاپ دەکات

PUKMEDIA

لۆگۆی کۆمسیۆن

کۆمسیۆنی باڵای سەربەخۆی هەڵبژاردنەکانی عیراق زیاتر لە 23 ملیۆن کارتی دەنگدانیان بۆ هەڵبژاردنی ئەنجومەنی نوێنەران چاپکردووە و وتەبێژی کۆمسیۆنەکەش رایدەگەیەنێت:" کارتەکان بەپێی ستانداردە جیهانییەکان چاپکراون".

جومانە غەلای وتەبێژی کۆمسیۆنی هەڵبژاردنەکان بە PUKMEDIA ی راگەیاند:" 23 ملیۆن و 555 هەزار و 500 کارت چاپکراوە، بەشێوەیەک ژمارەی کارتی دەنگدان بۆ دەنگدەرانی گشتی  گەیشتووەتە 22 ملیۆن و 46 هەزار و 200 کارت، هەروەها بۆ هەڵبژاردنی تایبەتیش یەک ملیۆن و 509 هەزار و 300 کارت چاپکراوە، ئەمە جگە لەوەی چاپکردنی کارتی  یەدەگ بۆ دابینکردنی پەسەند کراوە".

ڕوونیشیکردەوە:"کارتەکان بەپێی ستانداردە ئەمنییەکان چاپدەکرێن، لەوانەش نیشانەی ئەمنی شاراوە، رەنگی تایبەتمەند کە تەنها بە ئامێری تایبەت و تاقیکردنەوە دەستنیشان دەکرێن، هەروەها ئەو تایبەتمەندیانەی کە ڕێگری لە کۆپی کردن دەکەن،هەروەها جۆرێکی کاغەز  بەکاردەهێنرێت،کە بەشێوەیەکی تایبەت دروستکراوە هاوشێوەی ئەوانەیە کە لە دراودا بەکاردەهێنرێت و نیشانەی نهێنی زۆری  تێدایە ".

هاوکات، لە راگەیەندراوێکی دیکەدا کە کۆپیەکى دەست PUKMEDIA کەوتووە، جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانی عیراق، رایگەیاند: دەستەی کۆمسیاران رەزامەندی لەسەر دابەشکردنی کۆتایی دەنگدانی گشتی و تایبەت و راگوێزراوان دەربڕی، کە کۆی گشتیی دەنگدەران گەیشتە  21 ملیۆن و 404 هەزار و 291 دەنگدەر، کە بەم شێوەیە دابەشکراوە:

ژمارەی دەنگدەرانی گشتی: 20,063,773

ژمارەی دەنگدەرانی تایبەت: 1,313,980

ژمارەی دەنگدەرانی راگوێزراو: 26,538

ژمارەی ناوەندەکانی دەنگدانی گشتی 8,703

ژمارەی بنکە گشتییەکانی دەنگدان 39 هەزار و 285 بنکە

ژمارەی ناوەندە تایبەتەکانی دەنگدان 809

ژمارەی بنکە تایبەتەکانی دەنگدان 4501 بنکە

ژمارەی ناوەندەکانی دەنگدان بۆ راگوێزراوان 97 بنکە، ژمارەی وێستگەکانیش 321 وێستگە

ئەمەش لە كاتێكدایە، ئەنجوومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد، لەبەرئەوە ناوی لیست و قەوارەکان پێشکەش بە کۆمسیۆن کراوە و چاوەڕوانی کۆتایی رێکارەکانن، تاوەکو دەست بە بانگەشە بکەن.

PUKMEDIA