بەهەوڵی پارێزگاری کەرکوک کێشەی بازگەکان چارەسەرکرا

راگەیاندنی پارێزگاری کەرکوک

پارێزگاری کەرکوک لەگەڵ لیژنەکەی بەغدا لەکاتی چارەسەرکردنی کێشەی بازگەکانی کەرکوک

پارێزگاری کەرکوک رایدەگەیەنێت: کێشەی بازگەکانی کەرکوکمان چارەسەرکردووە و لەمەبەدوا میکانیزمێکی نوێی کارکردن لەبازگەکان جێبەجێدەکرێت، هاوکات بۆ چارەسەرکردنی کێشەکان فەریق سامی سودانی راوێژکاری سەرۆک وەزیرانی عیراق بۆ کارووباری گواستنەوە و گومرگ و وەفدێکی یاوەری سەردانی کەرکوکیان کرد و لیژنەیەکیان پێکهێنا .

رێبوار تەها پارێزگاری کەرکوک لەکۆنگرەیەکی رۆژنامەوانیدا رایگەیاند: ئەمڕۆ لەگەڵ لیژنەکەی عیراق سەردانی سەرجەم بازگەکانمان کردوو گفتوگۆمان لەسەر چارەسەرکردنی کێشەی بازگەکان کرد و رێککەوتین لەسەر پەیڕەوکردنی میکانیزمێکی نوێی کارکردن لەسەرەتای مانگی داهاتووەوە، ئەمەش لەپێناو باشترکردنی دۆخی هاتووچۆ لە بازگەکانی کەرکوک.

راشیگەیاند: میکانیزمەکە بەجۆرێکە، ئەو ئۆتۆمبێلە بارهەڵگرانەی کە کراوەن هێڵێکی تایبەتیان بۆ دەکرێتەوە کە نەوەستن و راستەوخۆ بڕۆن، هاوکات ئەو ئۆتۆمبێلانەشی کە داخراو و بچوکن هێڵێکی تایبەتی دیکەیان بۆ کراوەتەوە و کارئاسانی تەواوەتییان بۆ دەکرێت، هەورەها ئەو ئۆتۆمبێلانەی کە کەرەستەی هاوردەکراویان پێیە بەجیا مامەڵەیان لەگەڵ دەکرێت و بەزووی ریککارە یاساییەکانیان بۆ تەواو دەکرێت.

رێبوار تەها پارێزگاری کەرکوک ئاماژەی بەوەشکرد: لە هەر بازگەیەک ئامێرێکی سۆنەرمان زیاد کردووە و لەداهاتووشدا هەوڵدەدەین ژمارەکەی زیاتریش بکەین.

ئەمەش لەکاتێکدایە، ئەمڕۆ 20ی9ی2020 رێبوار تەها پارێزگاری کەرکوک، پێشوازی کرد لە فەریق سامی سودانی راوێژکاری سەرۆک وەزیرانی عیراق بۆ کارووباری گواستنەوە و گومرگ، کە لەسەر داوای پارێزگاری کەرکوک بە مەبەستی چارەسەرکردنی گرفتی بازگەکان سەردانی پارێزگاکەی کرد.

PUKMEDIA